Lahi ang first name nga iyang gigamit sa SSS

Dear Atty. Divine,

Ang akong mama gikatakda nang mo-retire next month sa SSS. Giingnan mi sa SSS to submit  og NSO copy sa iyang Birth Certificate ini’g process na namo sa iyang retirement, so mikuha si mama og NSO copy sa iyang Birth Certificate apan nakurat nalang siya kay ang first  name nga anaa sa iyang birth certificate lahi man sa iyang gigamit sa iyang mga dokumento lakip na sa iyang SSS.

Ang anaa sa iyang birth certificate Maria apan ang gigamit sa akong mama Marian. Unsay angay buhaton ni mama aron magtakdo ang iyang records kay basin mosango siya inigfile sa iyang retirement? Daghang salamat.

Margie

* * *

Dear  Margie,

Mamahimong ipausab sa imong mama  ang iyang first name sa iyang birth certificate sa Civil Registrar diin siya  marehistro. Duna nay listahan ang Civil Registrar sa mga dokumento nga angayan ninyong i-submit alang sa pag-usab sa iyang first name aron motakdo sa iyang records sa SSS, so, mas maayo nga adtuon daan ninyo ang Civil Registrar. Human niini inyong i-comply ang requirements aron ma-process ang iyang change of first name sa Local Civil Registrar.

Apan mamahimo sab nga inyong konsultahon ang SSS kun mamahimo ba kun Affidavit of Two  Disinterested Persons lang ang inyong i-submit nga magpamatuod nga ang Maria ug Marian same person ra siya. Kun mosugot ang SSS then di na kinahanglan nga inyo pang i-process ang pag-usab sa first name sa imong mama. Thank you and God bless.-- Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu  City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.