Editoryal — Di away sa US ug China

Duna gyuy karma o gaba. Mao kini ang paghulagway sa Armed Forces of the Philippines sa nahitabong pagkabitik sa sakyanang pangdagat sa Chinese Coastguard nga nang-harass sa supply boat nga maghatud og panginahanglan sa mga tropa niini sa BRP Sierra Madre sa Ayungin Shoal.

Nahitabo kini niadto lang nakalabay nga Biyernes sumala pa sa tigpamaba sa AFP nga si Colonel Medel Aguilar. Ang nabitik mao ang usa sa upat ka mga sakyanang pangdagat sa China nga nagsige og hasi sa supply boat sa AFP.

Matud pa ang Chinese rigid hull inflatable boat (RHIB) nabitik sa pisi sa Chinese fishing boat samtang nagsige kini og sunod-sunod sa supply boat.

Ang mga tropa sa BRP Sierra Madre mitanyag unta pagtabang kanila apan giabog sila niini. Paglabay sa pipila ka oras, naluwas ra ang RHIB sa laing RHIB gikan sa barko sa Chinese Coastguard nga naa sa duol.

Uwaw kaayo kini para sa China, ug gusto pa nilang balihon ang nahitabo kay gibasol nila ang supply ship nga maoy nakaingon nga nabitik sila.  Klaro kaayo nga ilaha kining padak-on ang estorya didto sa ilang nasud aron ipagawas nga abusado ang Pilipinas.

Dili na kini angay ikahibulong kay lisod man pud kaayo dawaton para sa China nga nagdanghag ilang mga crew maong naunay hinuon sila sa ilang laang.

Hinuon, dili kadto maoy isyu kondili ang padayong pagpanghasi sa China sa mga Pilipino sa kaugalingon nining nataran.

Sa mata sa uban, ang Pilipinas napagan lang sa panagribal sa China ug sa Amerika diha sa maong dapit. Apan sayop kini nga pagtan-aw, kay kung mao kana ang tratamento sa Pilipinas sa sitwasyon mura og wala diay kini katungod sa West Philippine Sea.

Kung duna may interes ang Amerika sa lugar, ila na. Ang interes sa Pilipinas angay pud ipatigbabaw pinaagi sa paghimo og kaugalingong pamaagi ug dili pinaagi lang sa Amerika. Sama nalang sa Ayungin,  tradisyonal na kining daan nga pangisdaan sa mga Pilipino, nakabintaha lang ang China nga duna silay daghang mga barko ug mga panagatan nga dili kayang tupngan sa Pilipinas sa numero.

Kun isalig lang sa Pilipinas ang tanan sa Amerika, unsa nalay ikasulti sa uban? Kinahanglan sa Pilipinas og 24/7 nga presensiya sa WPS.