Mga skywalk colorum?

Kini ang duha ka skywalk sa Osmeña Boulevard nga maapektohan sa Bus Rapid Transit kon BRT diin gikatakdang gub-on alang sa naasoyng proyekto nga gikatakdang mahuman sa buwan sa Desyembre karong tuiga nga maoy gitakda nga deadline mimo ni Presidente Bongbong Marcos atol sa ground breaking niini.

Gipangita karon sa Department of Transportation o DOTr, ang implementor sa BRT kon kinsa man gyud ang tag-iya sa mga skywalk kay ilang pananghiran nga gub-on alang sa pagkompleto sa ilang multimillion project.

Giadto na nila ang Department of Public Works and Highways kon DPWH aron dili sila ma-technical sa Commission on Audit kon COA.

Apan nanghunaw ang DPWH kay igo lang kuno silang nag implementar sa project nga namugna kaniadto pinaagi sa paningkamot sa namatay nga kongresista Raul Del Mar gamit ang pundo gikan sa kongreso, unya patay naman si Del mar ug nipuli ang iyang anak nga si Congresswoman Cute, apan dili mamahimong ipasa kini sa anak kay managlahi man sila kon programa na ang hisgotan.

Ang dakbayan sa Sugbo, samot nga dili sila ang tag-iya kay national project man kini ug wala usab kini matugyan ngadto sa city government.

Pastilan ang proyekto nga gigastohan og minilyon nga salapi wala namay moangkon nga tag-iya, bantog ra nga walay naghikotar niini sa pag atiman hangtud nga nangadaut na kini.

Nasuta usab nga walay permit sa LGU ang pagtukod sa mga skywalk, nagpasabot nga illegal ang pagtukod niini, dinhi na magamit ang kahigayonan nga pwede na gub-on ang mga skywalk kay illegally constructed man busa mamahimong makapadayon ang proyekto sa BRT ug wala nay babag pa niini.

Kong naglibog ang mga opisyal sa guberno kinsa ang tag-iya sa mga skywalks samot na ang mga tawo, pwede diay ipaangkon sa usa ka politiko ang natukod nga proyekto nga unta kwarta man sa katawhan ang gigamit ug igo lang gipaagi sa mga politiko ang kwarta aron mapatuman kini.

Kong wala pa ni ang BRT dili nato masayran nga wala diay nanag-iya ining mga skywalk nga gipangtukod.