Raffy gipul-ongan ni VP

Sa usa ka budget hearing sa Senado, giladlad ni Senador Raffy Tulfo ang mga reklamong gipaabot sa mga ginikanan ngadto kaniya, ang bahin sa Parents Teachers Association (PTA) voluntary contribution alang sa palitonong electric fans sa mga klasrom, chalks, galamitonong panglimpiyo sa kasilyas ug uban pa, diin matag tuig kuno sa dayong abli na sa klase mao gayod ang unang dugokan sa PTA’s meeting. 

Matud niya, adunay parents misumbong nga tungod sa voluntary contributions, kadtong ginikanang makahatag og dinagkong kantidad, suklian sa maestra og tag-as grado ilang anak ug mahimo pang honors. Samtang ang walay ikahatag, mangiwit. Maong may parents makabuhat na lag daotang paagi aron may ikatunol nga voluntary contribution ngadto sa teachers nga ginganlan ni Tulfo og ‘mangingilkil.’

Busa, gisugo ni Tulfo ang Department of Education (DepEd) Secretary and Vice President of the Philippines Sara ‘Inday’ Z. Duterte-Carpio nga ipahunong na kini kay dili himsog sa iyang panan-aw, labi na sa mga Dilawan, kinsa, sa niini pa lang kasayo, nangita nag paaging gub-on ang limpiyong imahe ni Inday aron mabalian na sa mga pako ug dili na makalupad pag-abot sa 2028 presidential election.

Sa sobrang kasakit sa mga pinulongan ni Raffy, kinsa kusganong mitudlo ni VP Inday unsay angay niining buhaton aron masumpo na kining PTA voluntary contributions, mapaubsanon gihapong mitubag-pahayag si Inday, kinsa matinahuron pang misangpit ni Tulfo og ‘Sir,” pinaagi sa pag-ingon:

“Madam chair, sa kanyang sinabi kung paano kayo makatulong na senator na kayo ngayon, puwede na man kayong gumawa ng batas na ipagbawal ang voluntary contributions sa mga PTAs. And then, puwede naman natin i-implement yan, may penalties po yong teacher or parent na mag-insist na may voluntary contribution.”

Sama kahait sa sanggot, gipul-ongan ni Inday ang naghinobra nang paglapas ni Tulfo sa linya nga dili na sakop sa iyang huridiksiyon. Gipahinumdoman siya ni Inday, nga ang trabaho niya isip senador, mao ang tighimog balaod ug dili ang pagmando sa executive body, diin si Inday kabahin niini. Trabaho sa executive body ang pag-aprobar-pagpatuman sa unsay balaod nga gipanday sa Senado. Ug dili iyaha ni Tulfo. Unta, may kasingkasing siyang morespeto sa piniling public servant nga mas taas niyag position.