Karaang problema

Hingpit na nga mobukas ang klase sa mga publikong tunghaan sunod semana, Agosto 29. Ug sama sa nanlabay ng mga tuig nag-atubang gihapon ang mga pampublikong tunghaan sa parehas o karaan nga problema kakuwang sa mga lawak saringan ug ang ubang dapit kuwang og mga maestra.

Gani dinhi sa dakbayan sa Sugbo duna pay mga gubaon nga classrooms nga wala pa hingpit maayo.  Apan luyo niining seryosong  problema nga giatubang sa DepEd, mas gihatagan og atensiyon ni Bise Presidente Sara Duterte ang pagpatangtang sa mga dekorasyon diha sa mga classroom.

Alang ni Duterte makabalda sa pagtuon sa mga estudyante ang mga dekorasyon sulod sa classroom. Tingali alang niya mas mabalda ang pagtuon tungod sa mga dekorasyon kaysa kakuwang gyud sa classroom. Dili tingali makabalda alang ni Duterte ang pagdasok sa mga tinun-an sa usa ka classroom tungod kay nanobra ang gidaghanon sa usa ka section.

Ambot unsay gibasihan ni Duterte ining iyang kamanduan. Di ko sigurado og duna ba siyay pagtuon nga gihimo nga nakakombinsir niya nga ang mga visual aids diha sa classrooms makabalda sa atensiyon sa mga estudyante.

Kun inyong nabantayan, dili man mga ordinaryong dekorasyon ang makita sulod sa classrooms. Sagad niini mga visual aids nga dako og ikatabang sa pagtuon sa mga bata labi pa gyud niadtong mao pay pagsugod sa pagtungha.

Pananglitan kanang mga letra sa alphabet nga dunay mga hulagway makatabang aron mas sayon ang pagproseso sa impormasyon alang sa mga gagmay ng tinun-an. May mga pagtuon nga nagkanayon nga ang visual aid makatabang aron mas dugay nga magpabilin diha sa utok sa bata ang kasayuran nga iyang makuha.

Epektibo sab ang visual aid aron madasig ang imahinasyon sa tinun-an alang sa mas maayong pagsabot sa leksiyon. Gawas niini makatabang ni nga mahimong interesting ang pagtuon ug dili laay o boring.

Nakalimot si Duterte nga secretary siya sa DepEd ug dili sa Commission on Higher Education. Ubos sa iyang departamento ang kindergarten hangtod sa high school. Dili tawn kolehiyo ang atong gihisgutan nga mahimo ra nga way visual aids diha sa classrooms.