EDITORYAL - Pamintaha panahon sa krisis
![EDITORYAL - Pamintaha panahon sa krisis](https://media.philstar.com/photos/2023/08/21/1_2023-08-21_23-26-29.jpg)
Halos tanang palaliton karon nagsaka na ang presyo, partikular na ang nagunang panginahanglan karon, ang bugas. Mao kini ang ‘staple food’ sa mga Pilipino, kun wala niini sa lamesa dili kompleto ang pagpangaon sa pamilya.
Apan dili lang bugas ang gikinahanglan kaayo sa mga tawo, usa niini ang petrolyo. Karon pwerteng mahala na sa matag litro sa gasoline ug krudo. Bug-at na para sa mga motorista kining sagunsong pagsaka sa presyo niini.
Dili makadiktar o dili makabuot ang gobiyerno gawas lang sa pag-regulate ug monitor sa pagsaka nga dili kaayo palabi. Apan bisan pa niini, bug-at gihapon ang piso-pisong pagsaka sa matag litro. Hinuon, ang ubang mga nanarbaho nga nagmotor mo-adjust nalang sa ilang palitonong gasolina matag adlaw padulong sa ilang trabaho aron mapaigo ang ilang sweldo o budget nga gitagana para nianang adlawa.
Apan dunay mga gasolinahan nga dili na mosugot nga P50 ray paliton nga gasoline, gusto nila minimum gyud nga usa ka litro. Ang presyo sa gasolina matag litro karon gikan sa P65 –P75 depende kun asa nga gasolinahan.Pwerteng paita para sa mga nagdaginot sa kwarta, samot na kun ang nahibiling kwarta P50 nalang gyud, bisan unsaon pagpuga mao ra gyuy naa sa bulsa. Magtulod nalang sa ilang motor pauli?
Mao sab kini ang ubang mga namaligya og bugas, tungod kay mimahal na, dili na sila mobaligya og ¼ kilong bugas sa ilang silingan, kinahanglan tunga gyud sa kilo kay mahal nalang daw ang bugas karon.
Luoya intawon sa mga kabus sa tanang kabus, dili nalang mangaon og kan-ong bugas? Kinahanglang duna gyuy minimum nga paliton?
Sa panahon karon nga mimahal ang tanang presyo unya walay usbaw sa suholan ang mga mamumuo, maayo tingaling mokonsiderar una ang mga negosyante nga dili mopatuman og minimum sa ilang pagbaligya.
Dili man kini matawag nga pamintaha, apan salikwaot paminawon kay mura og hinangol ang ilang gibuhat sa pagpamaligya.
- Latest