Clamping tokartokar maot

Kining balaod nga pagpang-clamp sa mga sakyanang mo-parking sa karsadang adunay ‘No Parking Zone’ signage, dugay na kaayong nagsugod. Ang problema lang, kay off and on ang pag-implementar sa atong Cebu City Traffic Office (CCTO). Hinungdan, nga off and on sab kining gituman sa mga drayber. Nan, kinsay sad-an: ang drayber sa behikulo, o CCTO?

Kadto lang kagubot nga nahitabo tali sa CCTO, tag-iya sa mga tindahan, tag-iya sa Sirao Flower Garden Cebu (gipakasamang Little Amsterdam nga tourist destination) ug mga drayber sa nagkalainlaing sakyanan didto sa Sirao, kinsa pulos wala mahimuot sa surprise attack sa CCTO dihang gipangklaman ang gipamarking nilang mga behikulo, diin sa pito ka tuig nilang paggamit walay g'yuy taga CCTO kanhi nga misita, pastilan, pagkamaot g'yong tan-awon!

Ang kadagkoan sa CCTO mipasabot sa mga hingtungdan. Nga ang ilang giparkingan, side walk kini sa pedestrian. Maong, adunay ‘NO PARKING ZONE’ signage.

“Kon mao, nganong pito man ka tuig ninyong gipakatulog ang balaod?” Maisogong sugmat sa mga mingreklamo.

May punto sila. Pero, correction lang! Dili balaod ang natulog. Kondili, ang tig-implementar sa balaod. Gani, CCTO mismo pa ang mitug-an nga tungod kay dunay mihatod og reklamo sa ilang opisina, ilang giaksiyonan. Nga sa ato pa, kon wala pa sila pukawa, dili gyod diay unta sila molihok?

Apan inay hataga'g taas higayon ang namarking pagkuha sa ilang sakyanan bugti sa pito ka tuig nga wala sila sitaha sa CCTO, igo ra kining mianunsiyo og pipila ka minutos, gipangklaman dayon ang nahabiling sakyanan kang kansang mga tag-iya atua pa sa halayo nalingaw pagsud-ong sa mga kabulakan. Resulta? Aw, miulbo g'yod ang kasuko sa mga hingtungdan, diin maayo na lang, nakahunahuna ang CCTO nga tangtangon ang mga clamp aron dili mahimong dugoon ang nag-alintabo nang situwasiyon. Pero nagplano, nga aduna silay kasohan. Husto ba?

Sa pito ka tuig nilang pagpabaya sa maong dapit nga maoy nahimong pabilo sa nahisgotang suliran, CCTO pay mokiha? Kon gipaagi pa lang unta sa pinabugnaw nga pagpaamgo ang estratihiyang gihimo sa CCTO, tingale, mahagkan-magakos pa sila sa mga hingtungdan.

May sipyat man ang CCTO.  Kanang ilang pag-clamp nga tokartokar. Diin, maot gayod ang gisangpotan. Unta, dili na sila mokiha.