EDITORYAL - Campaign funds padak-an

Mayoriya sa mga magbabalaod sa Ubos Balay Balauranan ang nakauyon sa giduso nga House Bill 8370 nga nagtinguhang ilisan ang 32 ka tuig nga Republic Act 7166 nga nag-limit sa mga kandidato paggasto og lapas P3 matag botante sa panahon sa kampanya.

Gusto sa mga magbabalaod nga ilisan na ang maong balaod kay dili na kini haom o wala na motakdo sa kasamtangang kahimtang sa ekonomiya karon. Ang maong balaod napasar niadto pang tuig 1991.

Sa bag-ong balaudnon, ang kandidato sa pagka presidente sa nasud mahimong mogahin og P50 matag botante, P40 sa bise presidente ug tag P30 sa mga senador ug kongresista. Samtang P5-P30 sa mga partilista.

Samtang ang mga independenteng kandidato gilimitahan lang sa P5 gihapon. Ambot unsay kalainan sa gastos sa independenteng kandidato sa usa ka botante itandi sa kandidatong dunay political party kun pareho ra man nga usa ka botante ang gihisgotan.

Ang rason matud pa sa pag-usab sa karaang balaod  kini aron katuohan sa kasamtangang panahon. Kay sa pagkakaron misaka na tanang presyo sa palaliton makapila ka pilo gikan tuig 1991, ug apil sa misaka ang presyo sa campaign materials ug uban pa.

Bentaha niini kadtong dunay mga political parties o mga adunahang kandidato kay makabwelo man paggastos atol sa kampanya.

Hinuon, bisan og usbon pa ang maong balaud, wala man gyud na sa tinud-anay gisunod sa mga kandidato. Daghan man ang mga gastos nga wala giapil sa ilang giduso nga campaign expenses ngadto sa Comelec.

Dili ikalimod, kun duna may giduso, siguradong dili kini maoy tinuod, wala man diha ang kanang gigasto sa bisperas sa eleksyon nga mao ang adlaw sa “kinamangay” ug tunolay og sobre.

Bisag mapasar pa kini, dili gihapon kini garantiya nga motug-an sa tinuod nilang nagasto ang mga kandidato.