Ang balaod dili lang sa patag apil usab sa bukid

Giuwan og pagsaway ilabi na sa social media ang gihimong pag-clamped sa mga personnel sa Cebu City Transportation Office o CCTO sa mga sakyanan didto sa Sirao Garden diin nag-viral gyud gani human gipistahan sa mga netizens.

Makita ang mga tawo didto nga nibabag ug nisukol sa mga CCTO enforcers hangtud nga napugos sila sa pagtangtang sa clamp aron dili na mosangpot pa sa mas grabe nga kagubot kay emotional naman ang mga tawo didto.Gikwestyon sa mga tawo nganong nakaabot sa bukid ang mga CCTO personnel nga naa man untay mas daghang badlongon sa sentro sa syudad, nganong daginoton ug tuyoan man gyud ang dapit sa bukid. Dili nato mabasol sila nga mao ni ang gibati kay nabag-ohan o nakuratan sa presensya sa CCTO personnel.

Para nako igo ra man naghimo ang mga CCTO sa ilang tahas kay lagi duna may reklamo nga naabot sa ilang buhatan kalabot sa huot nga mga sakyanan panahon sa weekend, kaduha gyud nakadawat sila og reklamo matud ni Raquel Arce ang pangulo sa CCTO.

Tungod kay naa may reklamo maong ilang giaksyonan pinaagi sa operasyon pagbadlong. Apan dunay wala gyud motuo maong giklaman nila. Ang dapit bisan og wala makaparking sa karsada ang mga sakyanan apan nasakop niini ang sidewalk o easement sa karsada.

Matud sa tag-iya sa Garden nga igo lang sila nangayo og katin-awan unta gikan sa pangulo sa CCTO kay lagi naanad naman sila sulod sa pito ka tuig nga ingon niini ang systema pero wala sila nagkaestorya.

Basin wala lang gyud nagkasinabtanay o wala pud natarong sa pagpasabot sa mga CCTO personnel ang mga namarking ilabi nga mga turista ang pasahero busa nisangpot sa kagulyang.

Seguro mas gipatigbabaw ang konsiderasyon ug gibadlong lang wala gipangklaman ang mga sakyanan dili gyud unta modako ang issue.

Gitan-aw pud unta ang mamahimong epekto sa turismo sa nahitabo kay ang dapit usa sa mga tourist spots sa dakbayan sa Sugbo maong giinat lang unta ang konsiderasyon niadtong tungora.

Apan sa habig sa mga CCTO personnel, nakadayeg ko kay napatuman nila ang maximum tolerance nga nalikayan ang kagubot. Samtang sa habig sa mga tawo unta respeto ang gipatigbabaw sa mga persons in authority. Kay ang nahitabo gud gipakagamay nila ug giakusahan pa gyud nga nangwarta sa bukid ang CCTO, timan-i nga naghimo ra sila sa ilang trabaho.

Masentro man o mabukid walay kalainan tubgod kay sakop ang tanan sa Cebu City. Busa gikinahanglan nga motuman ang tanan sa balaod ug sa mga enforcers dili lang kong dunay reklamo ayha na molihok, kong unsay gihimo sa urban areas, himoon pud unta didto sa rural area aron dili masurprisa ang mga tawong mabadlongan. Ambot kong makaya ba sa ka limitado sa manpower sa CCTO.