Panalipod sa kasapaan

Natibhangan gayud og dako ang likod sa among opisina sa The Freeman newspaper kilid sa Parian Creek sa downtown area ning dakbayan sa Sugbo isip pagsunod sa balaod sa pagpreserbar sa three-meter easement zone sa kasapaan.

Usa ang among opisina sa daghang establisimento sa siyudad nga angay mosibog kay nakabalda kuno sa mga creek ug suba sa dugay nang katuigan. Ug kinahanglan nga motuman kining maong mga establisimento aron dili kasohan sa lokal nga kagamhanan.

Estrikto na ang Cebu City Hall paggukod niining mga tag-iya sa mga estraktura nga nakalapas sa three-meter easement zone. Ug gani usa kini sa gipakusgan sa lokal nga kagamhanan ilalum sa 'Gubat sa Baha" nga kampanya niini.

Mao nang isip pagsunod sa lagda, ang management mismo sa opisina ang mipaguba sa porsiyon sa among building nga nakalapas sa three-meter easement zone. Tuod man, human sa pipila ka adlaw, nahawan na gayud ang likod sa among building.

Hinuon, sa akong nakita, wala pay aksiyon ang kasikbit namo nga mga establisimento. Apan akong nadunggan nga gihatagan kuno sila og unom ka bulan sa kagamhanan sa dakbayan pag-aksiyon sa ilang kalapasan.

Hinaut nga tinud-on sa City Hall paggukod kadtong mga malapason the three-meter easement zone. Anaay daghang establisimento sa siyudad nga klarong milapas sa lagda nga sa dugay nga panahon wala gayud masita sa kagamhanan.

Nasugdan na kining paggukod sa mga malapason sa balaud ug kinahanglan nga tinud-on na gyud kini sa kagamhanan kon gusto gayud kita og kabag-ohan ug kalamboan. Kini bisan pa man kon kinsa pa ang personalidad nga maligsan.

Abir, atong panid-an kining maong kampanya sa dakbayan sa Sugbo pagprotehir sa kasapaan. Hinuon bag-o pa lamang kini nga miarangkada. Ug dako atong panghinaut nga molampos gayud kini alang sa kalamboan sa siyudad sa Sugbo.