Dakong itlog ang grado
Lisod nang daan ang pagpahibawo sa mga konsumidor nga magpadayon ang pagsaka sa presyo sa bugas humay. Labi na kon nisaad ang presidente paghimong P20 kada kilo sa bugas humay. Maong gisunod sa administrasyon ni Presidente Ferdinand Marcos Jr. ang:
• Bohemyo nga bana nga nipasalig sa iyang asawa nga di mahitabo nga moabot og duha ang iyang kabit sa pagkumpisal nga nakasala sa ilang kaminyoon; ug
• Ligoy nga estudyante nga ni-garantiya sa iyang mga ginikanan nga wa siya mataktak sa eskuylahan sa pagpahibawo nga gisuspenso sa klase tungod sa pagpangopya.
* * *
Nipasalig ang administrasyon nga di angayng mag-panic ang katawhan kay di moabot og P75 kada kilo ang bugas humay. Kini human naneguro ang presidente, nga niinsistir pagpabilin isip agriculture secretary, nga nagpabiling barato ang bugas humay bisan nagsige og umento sa nangaging mga semana.
Monitoring sa Department of Agriculture (DA) nagbutyag nga ang P2 kada kilo nga uminto nahimong P5 kada kilo pagka sunod semana, hangtod niabot og P8 kada kilo sa niaging semana. Sa way pag-angkon nga namakak ang presidente, ang DA nipasalig nga di mas dako ang sulbong.
* * *
Timaan nga mas momahal pang bugas humay sa mosunod nga mga adlaw: Nipahibawo ang mga negosyante nga ang presyo sa tipasi nisaka ngadto sa P34.50 kada kilo. Ubos sa formula sa industriya nga madoble ang presyo sa tipasi kon patongan na sa gasto sa paggaling, pagsako ug transportasyon, ang presyo sa bugas humay moabot na og P69 kada kilo.
Di tuod kaabot og P75. Pero labaw og P49 sa pasalig sa presidente atol sa kampanya.
* * *
Sama sa naandan, napakyas si Marcos pagpangandam sa nag-ung-ong nga krisis sa bugas humay. Wa maleksiyon sa iyang pagpasamot sa krisis sa asukar sa niaging tuig (hangtod karon wa pa moubos ang presyo bisan abunda nang suplay). Wa sab makat-on sa iyang kapakyas pagbadlong sa pagsulbong sa presyo sa sibuyas, itlog ug ubang produkto sa agrikultura.
Wa pay nakitang ebidensiya nganong sobrang bilib si Marcos sa iyang kaugalingon nga maoy labing takos nga agriculture secretary. Kon padaghanay sa krisis, way makalabaw niya. Ang grado sa iyang pasalig paghimong abunda ug barato sa suplay sa pagkaon, nakatag-an ka, dakong itlog.
* * *
- Latest
