Kumpisal sa gitumbok nga kriminal

Nisuka na si Simeon Gabutero nga siya gyud diay ang nipatay sa 19-anyos nga si Rhea Mae Tocmo pinaagi sa iyang gilagdaan nga extrajudicial confession atubangan sa abogado ug mga testigos ug gi-subscribe usab sa Cebu City Prosecutor's Office kagahapong adlawa.

Gisaysay niya ang tanan nga sirkumstansiya nganong nahimo niya ang krimen diin kong basehan ang iyang pamahayag tumang kasuko ug selos ang nagtukmokd kaniya sa pagkutlo sa kinabuhi sa dalaga.

Aduna diay kini silay relasyon isip manag-uyab pinaagi lang sa Facebook nga nagsugod niadtong buwan sa Disyembre sa nakalabay'ng tuig.

Long distrance o virtual romance ang ilang panaghigugmaay kay wala man gyud sila nagkakita, gawas lang niadtong Hulyo 16 niya nasayran nga nia diay sa Cebu ang dalaga kinsa nag-text kaniya dihang nahubog ang biktima.

Gipaadto niya sa ilang balay sa Guadalupe ang biktima kinsa gipasakay og habalhabal ug gi-instructionan lang asa dapit ug hangtud nakaabot sa ilang giabangan nga balay.

Didto nakita ni Simeon ang bag kuno sa biktima nga dunay drug paraphernalia ug hubog usab kini hinungdan nga gibasa ni Simeon ang sulod sa cellphone ug didto iyang nasuta nga duna kunoy daghang mga lalaki nga gika-chat sa biktima ug mao kini ang hinungdan nga napanglimotan siya ug natuok ang biktima nga nisangpot sa kamatayon  niini.

Pagka gabii na gidala niya ang karton nga gisudlan sa lawas sa biktima didto sa daplin sa karsada sa sitio Mojon, Barangay Tisa sakay sa motor ug duna usab siya'y kauban nga wala pa niya itug-an.

Gawas sa pagkompisal sa suspek, gipalig-on pa kini sa resulta sa DNA  nga nagpositibo nga takdo gyud sa vocal swab ni Gabutero ang nakuha nga specimen gikan sa koko sa biktima.

Pon-an pa sa mga cctv ug pamahayag sa mga saksi busa masaligon ang mga otoridad nga lig-on ang kaso nga ilang ipasaka batok sa suspek.

Gipangandaman na usab sa mga otoridad ang posibleng pagbali sa suspek sa iyang pamahayag nga sagad mahitabo kon anaa na kini sa korte.

Ang naasoy'ng kalamboan dako na kong tan-awon apan ang ubang mga tawo aduna pa gyu'y pagduda kon unsa gyud ang nahitabo kay lagi naa pa kunoy uban nga mga tawo ang posibleng nalambigit niini.

In fairness sa kapolisan gihimo nila ang tanan aron matakdo ang mga nakuhang ebidensiya alang sa kasulbaran sa krimen ug sa kataposan nakuha gyud ang resulta busa hatagan nato og credit ang ilang paningkamot inay sawayon.

Ang kadtong kusog manaway pastilan naki-marites ra to sila sa issue, unsa man ang ilang nabuhat? Kadtong grabe naka pang-bash sa mga otoridad ayaw palabi nga sobra ra kaayo kay ang tanan ra ba dunay limitasyon. Basin baya og pagkasawsawera sa isyu maamong na hinuon sa pagpasaka og laing kaso.