Ang kinabuhi

Ang matag usa nga buhi ning katilingban sa kalibotan may lainlain nga kalihokan nga may relasyon sa iyang kinabuhi ug pagpakabuhi.

Ang kinabuhi ug pagpakabuhi giubanan kini sa tumang pagpanglimbasog sa bisan unsang matang sa mga gisudlang panginabuhian.

Lainlain ang pagtratar sa matag usa sa matang sa panginabuhian nga ilang gisudlan. May mitratar niini nga sayon ug aduna usab mitratar niiini nga lisod.

Sa mga may kaya ug may saktong kahibawo, sayon lamang alang kanila ang pagsulod sa gisudlan nga panginabuhian. Kun aduna man ugaling naglisod pipila lamang sila ka pudyot. Sayon ra pod nila ang pagsulod sa mga dagko ug ligon nga trabahoan ilabi na kun tagas usab ang ilang kahibawo. Ang uban gani kanila makapili pa sa panginabuhi nga gusto nilang sudlan.

Sa mga walay kaya ug walay igong kahibawo, lisod alang kanila ang panginabuhi. Ang alibyo aron makabaton og panginabuhian dili magpili og matang sa panginabuhi. Diskarte lang.

Malisod man o sayon ang panginabuhi manglimbasog lang gyod aron mabuhi. Ingon ani ang panginabuhi.

Ang problema, daghang balabag ug mga pagsuway ang masugatan sa panginabuhi. Anaa ang krisis sa ekonomiya. Anaa ang mga nagkalainlaing kalamidad ug uban pa.

Apan bisan pa man niini buhi ta. Hinuon adunay uban kanato nga wala na makaagwanta. Mitaliwan na.

Ang kinabuhi nagdepende sa matang sa panginabuhi sa matag usa. Kun unsa ang kinabuhi sa tawo bunga kini sa matang sa iyang panginabuhi ug pagpaningkamot, mao nga wadwad ug lihok. Ayaw isalig ang imong kinabuhi sa suwerte o tsansa.

Apan bisan tuod dili nato isalig ang atong kinabuhi sa suwerte o tsansa, sa imong pagpangaliya, apila nga ang imong wadwad ug lihok ubanan og suwerte. Basin pa diay mapariha ka sa uban nga na dato. Na milyonaryo ug nabilyonaryo. Tan-awa si Manny Pacquiao. Na-bilyonaryo, na- kongresman ug na-senador tungod sa iyang  kumo  nga maoy iyang gihimong puhonan sa iyang panginabuhi. Magpresidente pa gani unta sa Pilipinas. Napildi lang.

Gisuwerte siya sa iyang  kumo  nga maoy puhonan sa iyang panginabuhi. Pero dili ang suwerte ang naghatag kaniya og panginabuhi. Ingon ani ang kinabuhi.