Catapang isog og ginhawaan

Namatud-an na nga ang gipiling tawo ni Justice Secretary Crispin ‘Boying’ Remulla nga si General Gregorio Catapang isip maoy bag-ong Bureau of Correction (Bucor) chief, dili haom ning dakong position nga nagkinahanglan og puthawng kamot sa pagdumala.

Nahisulat  sa kasaysayan kadtong kapalpakan ni Catapang niadtong siya pay Chief of Staff sa Armed Forces of the Philippines (AFP), diin inay matabangan ang Special Action Force (SAF) 44, kinsa nangayog reinforcement batok sa mga teroristang kaaway, nangamatay hinuon kini sa maong January 15, 2015 Mamapasano encounter.

Hinuon, sa House hearing, wala angkona ni Catapang iyang sipyat. Iya kining gipahid ngadto ni SAF Chief Director Getulio Napeñas, kinsa iyang gipasanginlang wala kunoy salig sa AFP.

Apan bisan unsaon sa pagpanghinaw ni Catapang, dili na matago ang iyang kakulangan.

Hinungdan, daghang nakurat dihang mihimog kahibulongang hitabo si Justice Remulla aron mapapha si illegal drugs warrior Bucor Chief General Gerald Bantag ug maoy gipuli ang druglord-friendly nga Catapang. 

Tiaw bay, sa House hearing mahitungod sa pagkahanaw sa person deprived of liberty (PDL) Michael Catarroja, nahisgotan ni Catapang nga ‘human rights’ kuno sa mga PDL ang maka-order og lamiang pagkaon sa gawas. Maong gitugotan niya silang magtener og selpon sulod sa Biibid.

Unya, dihang gipangutana siya ni Representative Erwin Tulfo bahin sa nawalang PDL, nganong wala gilayon kini gipaabot ngadto sa DOJ secretary ug nganong miabot pa kunog duha ka adlaw ayha pa pahibaw-a si Boying kay maot kon ang media pay makauna ug walay ikatubag si Boying kon sukitsukiton sa reporters, daw mikanga si Catapang nga namahayag: “Kasi, hindi pa po conclusive ang iireport ko kay secretary.”

Ug gihimo pa niyang dugang rason ang heart-bypass operation ni Boying agi’g pag-amping sa panglawas niini. Total, segurado man siyang wala makapuga si Catarroja, naa ra sa sulod gipangita. Busa, okay ra!

Pastilan, nagpaila lang kini unsa ka huyang nga pagka-Bucor chief si Catapang. Gani, may kongresista nangutana nganong gidawat niya ang maong position nga dili man diay niya kaya? Usab, may mibadlong nga hunongon na niya ang pagsigeg gamit sa ngalan ni Gen. Bantag aron maoy itabon sa iyang kapalpakan.

Makauulaw! Pero gipahiyoman ra ni Catapang. Isoga niyag ginhawaan, sa?