Adlaw sa panudya sa Simbahan
Ang nahitabo sa Portugal, nga napugos ang kadagkoan sa Simbahang Katoliko pag-angkon sa ilang pagdupa sa pangabuso sa kaparian sa kaliboan ka bata sa niaging pito ka dekada, mahimong mahitabo sab sa Sugbo ug Pilipinas. Pila ka buwan o pila ka tuig gikan karon.
Ang baruganan sa mga obispo sa Portugal sa wa pa ang independenteng imbestigasyon sa pangabuso way kalainan sa sinultihan sa mga obispo sa Pilipinas–pipila ra ang nabiktima, magpabilin sa ilang parokya ang gireklamohang mga pari ug ma-eskandalo ang simbahan kon moabot ang mga kaso sa korte.
* * *
Ang independenteng komisyon, nga gitukod sa simbahan sa Portugal tungod sa sibaw nga awhag nga himuon ang samang pakisusi sa ubang kanasuran, naka-dokumento sa kaso sa 4,815 ka mga bata nga gi-abusohan sa mga pari sa niaging 70 ka tuig. Kumbinsido ang mga imbestigador nga mas daghan pang biktima ang pabiling nagpakahilom.
Kasagaran sa mga biktima hagbay rang nangreklamo. Pero way naminaw nila. Ang eskandalo sa Portugal way kalainan sa mas unang nabisto nga mga pangabuso sa kaparian sa Simbahang Katoliko sa Australia, France, Germany, Ireland ug the Netherlands.
* * *
Ang pasiunang kabugnaw sa reaksiyon sa mga obispo sa Portugal nasapawan sa awhag ni Pope Francis nga ang hilak sa mga biktima kinahanglang dawaton ug paminawon. Niangkon siya nga ang mga pangabuso nahimong pabilo sa kahimangod ug kasuko. Matod niya ang Simbahan angayng magpaubos ug manlimpiyo.
Atol sa pagduaw ni Pope Francis sa Portugal, gipatangtang sa lokal nga mga opisyal ang billboards sa pangabuso. Pero tungod sa iyang pakigtagbo sa mga biktima ug protesta sa katawhan napugos ang mga politiko pagpabalik sa billboards.
* * *
Ang adlaw sa panudya umaabot na dinhi sa ato. Diin sud sa daghang katuigan gitagoan sab ang pagpanlugos sa pipila ka pari ang kabataan ug kababayen-an. Gigamit ang kaputi sa ilang sotana ug influencia sa simbahan sa pagpahilom sa mga biktima ug sa ilang kaparyentihan.
Pero way krimen nga matago hangtod sa hangtod. Sama sa inilang monsenyor kansang pagkabalhin sa Sugbo human palagpota sa iyang kongregasyon sa Estados Unidos uwahi nang nasakpan sa Vatican. Masilotan rang kriminal nga mga pari. Uban sa mga obispo nga nidupa sa ilang katampalasan.
* * *
- Latest
