Ikalipay nga kapoyon ka

Kon edaran na gani ta, dili gyud maayo nga magsige na lang og higda, nga mora’g mahadlok nga mahago ang lawas, kay kon himoon nimo ni, masakit ka hinoon.

Kinahanglan gyud nga molihok gihapon ta, ayaw kahadlok nga kapoyon ang imong lawas, kapoyon ang imong mga bukton ug mga paa, kay bugti niana napaugnat nimo ang imong kusog.

Usa nako ka kaila, direyot gyud masikwati kay tungod sa pagsige niya’g higda, lingkud, unya higda na sab hapit sa tanang oras, nanambok pag-ayo.

Tungod sa way paugnat sa kusog, aw naputos sa tambok ang iyang dughan ug apil na ang kasingkasing. Unsay resulta? Naglisud og ginhawa ug nasu’d gyud sa Intensive Care Unit.

Usa ka semana kapin sa ospital ug bisa’g nakagawas na, giresitahan pa sa doktor og pwerteng daghanang tambal, unya giabisohan nga magpaugnat gyud sa kusog.

Dili nato patuyangan ang lawas sa pagpahuway, nga mahadlok na ta nga motrabaho kay lagi, edaran na kuno, angay na kunong mopahuway. Sayop gyud na.

Busa, mentras may panahon pa, tumana gyud ang akong tambag kaninyo aron dili masayo ang pagbalhin sa imong birthday ngadto sa Nobiyembre 1.

Kon molihok ka sa mga gimbuhaton sa balay, nahimo ka pa nga mapuslanon. Ako bitaw, kanang Sabado ug Domingo nga wa ko’y programa sa radyo, magkuri-kuri gyud ko og bisan unsay matrabaho. Gisuwat ko kini aron nga magiyahan ang mga igsuon nato nga edaran na nga basin nagtoo sila nga kay retired na sila, dili na sila angay’ng motrabaho.

* * *

Ang tagdumala sa usa ka tigbaligya og mga puthaw diha sa Sikatuna Street, Cebu City, gibadlong sa mga opisyal sa Cebu City Transportation Office kay ang ilang mga puthaw gibutang nila sa aseras atubangan sa ilang building.

Kanunay nila kining gihimo ug sinati kaayo ko niini kay anaa ko mag-agian kanunay diha sa Sikatuna Street.

Ang ilang building apil sa mga mi-encroach ngadto sa sapa nga gikan sa Barangay Day-as ug hinungdan nga maglunop diha sa Bonifacio ug Sikatuna duol sa Barangay Parian.

Ang eskina Bonifacio ug Sikatuna kanunay’ng lunopan kon mag-uwan kay ang tubig-baha nga gikan sa Barangay Day-as dili na hapit makaagi sa maong sapa aron adto unta matagak sa T. Padilla river.

Ngano man? Ang mga building ug panimalay dihang dapita mi-encroach na ngadto sa sapa ug mao nga daw nahimo na lang nga kanal ang sapa nga lapad unta kaniadto. Nagkinahanglan og “kamay na bakal” ang mga opisyal aron nga mapabalik nila ang karaang gidak-on sa atong kasapaan.