Usba ang imong paagi pagpili

Nindot unta kon usbon na sa katawhan ang ilang batasan sa pagpili og mga opisyal sa tagsatagsa nila ka barangay.

Kon kaniadto mobotar sila sa kandidato kay sikat kaayo sa tigbakayan, kay tig-adtoan kini kon dunay mamatay, kay maayong mohatag kon may mag-solicit og uniform sa basketball, karon dili na unta nila kini himoon.

Ang mga kandidato nga angay nilang pilion mao kadtong mga tawo nga nagtan-aw alang sa ilang kaayohan. Pananglit ang inyong problema sa way koneksyon sa tubig giatiman ba nila?

Kon ngitngit ang inyong dapit kay wa mapulihi ang mga pundir nga bombilya sa mga poste ug ang mga hingtungdang opisyal wa makaatiman niini, angay diay sila sublian?

Kon ang inyong mga kanal dili na makaagos ang tubig kay napuno na sa mga lapok, unya wa makaatiman ang mga kaila ninyo nga konsehal, angay diay sila nga sublian?

Pananglit dunay mga kaila nila nga “nagpahumot” na karon ug naghimo’g mga proyekto, sutaa ninyo kon ingon ba gyud niini ang ilang batasan.

Dunay posibilidad nga kining mao nga mga tawo naghimo og mga nindot nga binuhatan aron malukmay ang mga botante ug pilion sila atol sa eleksiyon.

Lain pa, tan-awa kon ang mga nangambisyon paglansar pagka kapitan sa barangay maantigo ba sa maong katungdanan nga gusto niyang huptan.

Pananglit dunay mga opisyal kaniadto ug gustong mobalik sa katungdanan, handoma kon giunsa nila ang pagdumala sa barangay sa miaging katuigan, ug hinuktuki kon angay ba silang hatagan sa inyong botos.

* * *

Ako hinuon, moklaro gyud ko nga kadaghanan sa mga opisyal sa kabarangayan nagkingking ug nahadlok nga mohimo og mga lihok nga makapasuko sa mga botante ngadto kanila.

Ang husto nga mga opisyal sa barangay, o bisan na sa mga lungsod ug siyudad, dili mahadlok nga mopatuman sa balaod bisan pa og dunay mga dumadapig nila nga maapektohan.

Mao kini nga makaingon ko nga pananglit moabot ang panahon nga sa pagbuot sa Ginoo mahimo ko nga pinili nga alagad sa kagamhanan, usa ra ko ka termino.

Ang mga opisyal sa barangay angay gyud unta nga molihok paghawan, paghapsay ug pagsiguro nga malinawon ang ilang tagsatagsa ka dapit.

Dili mahimong tugotan ang mga tawo nga nagpuyo daplin sa karsada nga ang ilang mga balay moabot na sa luna nga gitagana para sa publiko.

Kon ang aseras nga para sa publiko mahawanan sa mga opisyal sa barangay, hapsay gyud kaayo ang ilang dapit. Sayop ang batasan sa mga ubang opisyal nga magsalig ra sa City Hall nga hawanan ang ilang aseras, apan inigtalikud, balik na pud.