Sakit kong mapakyas

Karong adlawa ang ikaduhang State of the Nation Address ni Presidente Ferdinand Marcos diin matubag ang mga pagpangumusta katawhan sa tinuod nga estado sa nasud usa ka tuig human siya milingkod sa katungadanan.

Bisan kinsa ug bisan asa ta mahisum-ok, ang pangutana gyud nga masugatan mao "kanus-a man matuman ang tag P20 nga presyo sa bugas nga usa sa gisaad ni PBBM?"

Bitaw daghan gyud ang naglaum nga mahitabo kini sanglit gipangunayan man gyud sa presidente ang paghupot sa Department of Agriculture, syaro dili ni matuman nga presidente na secretary pa.

Apan sa pagkakaron ngitngit pa man sa alkitran nga mahitabo kini, mahulog pa sa impossible dream kay mas nimahal pa man gani ang presyo sa bugas.

Hinuon makita nato ang paningkamot sa presidente sa iyang paglusad sa Kadiwa ng Pangulo diin mapalit ang mga produkto nga mas barato ang presyo.

Sa Kadiwa apil sa mapalit ang NFA rice nga tag P25 ang kada kilo apan limitado lang sa tag lima ka kilo kada tawo ang mapalit, maayo og kalidad ang bugas dili baho ug dili pud dugmok.

Nindot ni pero dili pud lagi pirme kay kong adunay espesyal nga ra man nga kalihokan mapalit ang baratong bugas.

Gipasabot sa NFA nga igo ra gyud ang ilang supply nga giandam labi na sa panahon kong adunay mga katalagman kay wala naman kunoy importation karon hinungdan nga dili sila makapatuyang og pagpamaligya sa bugas.

Kahinumduman kaniadto duna may NFA outlet sa mga merkado nga kadaganan sa mga tawo nga nagkalisod apan karon wala naman.

Maayo unta mahibalik kini aron man lang mahatagan og gamayng katumanan ang saad nga baratong bugas.

Ang flagship program karon sa BBM administration ang pabalay apan nitiyabaw usab ang mga kabus nga walay ikasarang kay dili man libre, naay binuwan nga bayranan, barato alang sa uban nga naay ginagmay’ng panginabuhi pero dili ma-afford sa mga kakha tuka.

Kong atong tan-awon daghan pa kaayong mga tawo nga anaa gani magpuyo sa aseras kansang survival nagdepende sa halin sa mga basura nga ilang gipatimbang, wala na ganiy ikapalit og pagkaon, ibayad na ba sa balay.

Usa pa man ka tuig nga nagdumala si PBBM busa hatagan pa nato og higayon basin diay matuman ang iyang gipanaad sa dili pa siya mokanaug sa gahum.

Pero karon karon pa lang dili nalang kaayo magdahum kay basin masakitan lang, sakit kong mapakyas ra ba.