Kinsay hawod: ICC o atong gobiyerno?

Sukad pa sa 2019 nga wala na magpasakop ang Pilipinas sa International Criminal Court (ICC). Panahon pa sa pagpamunoan ni kanhi Presidente Rodrigo Roa Duterte (FPRRD), kinsa tungod sa iyang ‘War on Drugs’ giakusahan siya sa mga illegal drugs syndicate ug protectors nga napunta na kuno sa extra judicial killings (EJK) ang gipanghimo sa mga kapolisan nga hugtanong mituman sa iyang kamandoan.

Nakagamot na ang illegal drugs trade sa atong nasud. Lisod nang lukahon. Pero himatikdan sa katawhan, nga panahon ni FPRRD mihinay kini. May Senador Leila de Lima ug bigtime druglords nga nangabilanggo. Ug mga kawat, tulis ug uban pang daotang buhat naminus. 

Apan bisan pa niini, ang Commission on Human Rights (CHR) mipalag kay may mga polis kunong nananom og pekeng ebidensiya ngadto sa gipamatayng pobreng nahilambigit sa drugas aron himoong legal ilang operasiyon. Busa, usa ang CHR sa nangusog nga ipaabot sa ICC kining maong isyu aron paimbestigahan.

Ug ning pagpamunoan ni Presdente Bongbong Marcos (PBBM) sa Pilipinas, diin pulos pusong mamon ang gipang-appoint niyang PNP chief nga maoy nakapaabundag balik sa illegal drugs ug mga dautang elemento nga mihinay na unta, misamot kaagresibo ang ICC nga ipadayon ang pagtuki sa gipasangil nga EJK War on Drugs ni FPRRD. 

Dili ba kining gihimo sa ICC usa ka dakong insulto sa Pilipinas? May kaugalingon man tang Supreme Court (SC), internal problem man ning kasoha, unya nganong mag-apil-apil man ang ICC? Mideklarar na ba atong Department of Justice ug SC nga dili na kaya nila ang paghupot niini?

Sa tinuoray lang, sagad sa wala makauyon sa pamaagi ni FPRRD, kinsa sagad pro-illegal drugs and protectors maoy naningkamot nga ipapisak siya.

Hinuon, niining bag-o midesisyon si PBBM, nga dili na makig-istorya sa ICC human ibasura sa Appeals Chamber ang hangyo sa Malakanyang nga ipadaplin lang una ang nahisgotang imbestigasiyon. Usab, si Justice Secretary Boying Remulla miklaro, nga dili mokooperar ang Pilipinas ingkasog moisyu'g warrant of arrest ang ICC bahin niining kasoha.

Saludo ko ning ilahang hukom. Wala lang nila protektahi ang soberiniya (sovereignty) sa atong nasud. Usab, ilang gipaila sa tibuok kalibotan, nga niining yuta tang natawhan, dili ICC maoy hawod. Kondili, atong gobiyerno!  (BANAT NEWS)