Binhi

HULYO 16, 2023: Ikanapulog-lima nga Domingo sulod sa tuig

Mga Pagbasa: Is. 55;10-11/Sal. 65/Rom. 8;18-23/Mt. 13; 1-23

Maayong Balita

Gigamit ni Jesus ang naandang kahimtang sa iyang kapanahonan aron pagpadayag sa mensahe sa kaluwasan.

Ning tungora iyang gihulagway ang pulong sa Dios ingon nga binhi nga gisabod sa mga nagkadaiyang mga dapit.

Sa mata sa mga mag-uuma gigamit sa nagsabod kun unsay anaa nga kahimanan ug kahigayonan. Kaniadto gud dili kaayo maayo ang yuta sa panguma didto sa Israel.

Sa mata sa tag-iya say uta, usa lamang kini ka dakong pag-usik usik sa binhi.

Kasinatian

Ang Pulong sa Dios gamhanan na sa iyang kaugalingon lamang apan bisan pa man niini ang iyang gahum mamahimong kawang lamang kun ang gitisokan niini magdumili sa pagdawat niini o moamping niini.

Ang atong tagsa tagsa ka mga kasingkasing maoy gitisokan niini.

Dili kini molambo kun dili nato tugotan ang pulong sa Dios nga mogiya kanato ug mamahimong sukaranan sa matag adlaw sa atong kinabuhi.

Matud pa sa awit ni Narcisa Fernandez nga nagkanayon:

Ang Bibliya Balaang Kasulatan, kinabuhi sa atong Simbahan Ang Bibliya Buhing Pagtuo, Ang Bibliya Pulong sa Dios!

Lihok

Karong semanaha basaha ang Balaang Kasulatan. Kun dunay  Bible Guide adtoa ang Parokya ug pagkuha niini aron duna kay giya sa imong inadlaw nga pagbasa sa Balaang Kasulatan.

Ug kun dunay kalibog kalabot sa teksto pangutan-a ang inyong padre kura kalabot niini.

Pangamuyo

Tanan: Sulti Ginoo, kay maminaw ang imong mga sulugoon! Ang Pulong Mo O Ginoo among kahayag ug among kaluwasan!

Himaya ug Pagdayeg Alang Kanimo! Hangtud sa Kahangturan! Amen.