Problema  sa trapiko

Ang way kahumanan nga mga proyekto sa Department of Public Works and Highways (DPWH) diha sa unang distrito ug ang daw sa way kasulbaran nga problema sa trapiko gikan sa Talisay paingon sa Minglanilla kalbaryo sa mga motorista paingon sa habagatang Sugbo.

Ang kaniadto usa ka oras ug tunga nga biyahe gikan sa dakbayan sa Sugbo paingon sa Argao karon moabot na og tulo ngadto sa upat ka oras.

Kun dimalason ka ug maatlan nga dunay dagkong okasyon ug maghuot ang kadalanan sa Carcar moabot gyud gani og unom ka oras.

Ang trapiko timailhan sa paglambo sa usa ka dapit. Busa dili ni angayang isipong tunglo.

Apan dunay mga higayon nga ang hinungdan sa paghuot sa trapiko tungod sa di masabtan nga mga pamaagi sa mga opisyal.

Pananglitan, ang way kahumanan nga road repair nakasamot sa kahuot sa trapiko. Di gyud ko kasabot nganong nagsige nalang og ayo sa national highway ang DPWH bisan ang mga dapit nga maayo pa tungod kay di pa sab dugay nila nahuman og ayo.

Ang akong gikalibgan kay nganong kinahanglang kalkalon ang karsada ug sementohon pag-usab nga mahimo ra man unta tingali og sapawan og largo og aspalto.

Dili ba mas praktikal ni tungod kay gawas nga mas barato mas dali sab nga mahuman ug malikayan nga makabalda sa trapiko.

Pero ambot unsay nagpahipi nga katarungan nga bisan dyutay ra nga bahin sa karsada ang gubaon ang tibuok man gyud nga highway ang gub-on ug ayuhon?

* * *

Ug tingali panahon na gyud nga mangusog ang mga opisyal sa Sugbo alang sa mas moderno nga mass transport system paingon sa kalungsoran sa habagatan ug sa amihanang Sugbo.

Makatabang aron maminusan ang gidaghanon sa mga sakyanan sa karsada kun pananglit dunay Light Rail Transit (LRT) bisan kutob lang usa sa Metro Cebu.

Ug tingali nindot pud nga alternatibo ang ferry nga molagbas gikan sa SRP paingon sa kalungsoran.

Ang ferry maayong alternatibo paglikay sa trapiko.