Pagkaputot o stunted masolusyonan pa diay kon madali lang

Gisaulog niining buwan sa Hulyo ang Nutrition Month diin sama sa naandan gihimong sentro sa mga kalihokan ang mga programa nga nagtutuok sa panglawas sa katawhan ilabi na sa kabataan. Adunay mga parada nga gipahigayon sa mga tunghaan ug bisan gani sa kabaranggayan sama nalang sa Barangay San Nicolas Proper nga gipahigayon ang pinalahi nga bangga sa ilang mga e-bike, dili bangga sa disgrasya kon dili bangga sa kaanindot sa dekorasyon gamit ang mga masustansyang pagkaon.

Gawas niini ang pagluto sa mga lamian nga pagkaon gamit ang mga utanon, dahon ug ubang mga produkto gikan sa garden nga maghatag og kahimsog sa panglawas sa mga bata. Ingon usab niini ang gihimo sa tanan seguro nga mga dapit.

Gibuksan usab kagahapon ang ika-49 nga kasumaran sa Regional Nutrition Month celebration nga gisalmotan sa mga participants gikan sa nagkadaiyang dapit sa rehiyon ilabi na sa lalawigan sa Sugbo diin gi-display ang nagkadaiyang pagkaon nga abot sa bulsa ang presyo.

Gi-promote sa National Nutrition Council ang affordable nga masustansyang pagkaon nga kaya ra mapalit sa tanan ilabi na kadtong walay ikasarang. Nindot kaayo paminawon makaingon ta nga sanaol kong matuman kini ug dili lang karong buwana kon dili tibuok tuig gyud.

Sa record sa NNC moabot sa 8.5% ang nagkaproblema karon sa malnutrition ilabi na ang pagkaputot o stunted ang tubo, kanang wala katubo o mubo ra ang height kay sa iyang pangidaron. Dili diay tungod kay hereditary kon dili ang kakuwang sa masustansyang pagkaon ilabi na sa mga unang bahin sa pagkabata.

Murag gi-take for granted ang pagkaputot tungod kay ang mga nahitaboan niini nidawat nalang sa kamatooran nga ilang gituohan nga mao na gyud kuno ang ilang life pero sa kahiladman nibati sa kaguol nga daw dili na matambalan.

Kining problema mapangitaan diay og pamaagi basta matuman lang ang balanse sa pagkaon ug mahimo kini ni bisan kinsa basta mag kugi lang mananom og utanon sama sa backyard gardening. Kong dili ka gusto maputot hala kaon og utan ug ubang mga masustansyang pagkaon.