Kaso nila ni Bantag ug Zulueta gi-archive

Kataw-anan. Semana pa lang kapin human patya ang gi-riding-in-tandem nga hard hitting radio commentator, Percy Lapid niadtoing Oktubre 3, 2022, nanghambog gilayon si Justice Secretary Crispin ‘Boying’ Remulla atubangan sa social-mainstream media nga 95% na kuno nasulbad ang kaso kay nasubay na nila ang mastermind, diin hugtanon niyang gitumbok si kanhi Bureau of Correction (Bucor) Chief General Gerald Bantag ug gidamay pa si Bucor deputy director for security Chief Ricardo Zulueta.

Apan hangtod karon wala pa gihapon masugdi ang hearing sa maong kasong gisang-at didto sa korte sa Muntinglupa City, diin gilangaw intawon paghuwat ang husgado kon kanus-a motungha ang nahisgotang gipang-akusahan, kinsa human isyuhi og warrant of arrest, gipatungan pa gyod og minilyon ka pesos ang mga ulo aron dali matultolan ang gitagoan, pero pakyas gihapon ang kinatibuk-ang puwersa sa Philippine National Police sa pagsikop kanila.

Gumikan niini, nakahukom ang huwes nga hiposon lang una kining kasong kriminal nga gisang-at sa kampo ni Boying batok Bantag-Zulueta ug ibutang lang una sa archive.

Kahinumdoman, mga abogado ni Gen. Bantag ug Zulueta hagbay rang mipayil og petisiyon nga unta mo-inhibit si Boying niining kasoha ug gusto nila nga ibalhin sa Office of the Ombudsman ang paghusay aron mahimong patas ang pagtugkad sa matuod.

Samtang si Gen. Bantag dugay rang namahayag nga dili gyod siya moatubang sa korte kon dili moresayin si Boying. Ug iya kining gituman dihang giisyuhan siyag warrant of arrest.

Sanglit may balaod sa kasong kriminal, diin human malutsig warrant of arrest ang mga akusado, unya mo-unom na lang ka bulan gikan sa paghatod sa warrant, wala gihapon sila madakpi, mahimo rang i-archive o ipahipos kining maong kaso. Aw, gipa-archive na lang sa korte sa Muntinglupa City ang kaso  nila ni  Gen. Bantag ug Zulueta.

Dako kaayo kining tamparos ngadto sa nawong ni Boying. Kay ang iyang giingong sulbad na ang Percy Lapid’s murder case, nga sa miaging tuig pa niya gipasiatab, hangtod karon, wala pa man gani masugdig hearing sa korte.

Husto kaha ang usa ka de-kampanilyang abogado, kinsa miingon, dili haom si Boying sa iyang pagka-Justice secretary kay sige ra kunog kapalpak ug busa angay nang ilisan?