Advance rent ug deposit sa abangan

Dear Atty. Divine,

Ang akong balay gusto unta nako nga pa-abangan og long term. Unsay dapat nako ibutang sa terms and conditions? Pila sab dapat ang akong kolektahon nga advance rent og deposit? Kun di makabayad sa abang ang nag rent pwede na siya papahaon dayon? Daghang salamat. — Margie

Dear Margie,

Kinahanglan nga magpirmahanay mo og Contract of Lease sa mo rent sa imong balay. Ilatid gyud ang mga terms and conditions sa maong kontrata nga naglakip sa period sa pag-abang, pilay monthly rent, kinsay mobayad sa utilities, kun mapakyas siya sa pagbayad pilay interest, ug kun mapakyas siya sa pagbayad sud sa tulo ka buwan nga abangan mamahimo na siya nga papahawon ug uban pang mga kondisyon nga gusto ninyong ibutang sa kontrata.  Basi sa Rent Control Act of 2009, ang lessor sa residential unit mamahimo nga mo-demand og one-month advance rent ug two-month deposit. Buot ipasabot nga dili ka mamahimo nga mo-demand og advance rent nga sobra sa usa ka buwan, ug sobra sa duha ka buwan nga deposit. Kining deposit mao unya ni imong gamiton kun ini’g end sa rent naa siyay mga utilities nga wa kabayri or kun duna siyay nahimong damage sa imong  property ug ang sobra niini imo unyang ibalik sa nag-abang. Kun di siya makabayad sa rent sud sa tulo ka buwan mamahimo na siya nimong padad-an og notisya sa pag-vacate sa property kun mapakyas gyud siya sa pag-settle niini. Thank you and God bless. — Atty. Divine

Alang sa inyong panguta, palihug lang sa pag email sa [email protected] ug akong tubagon ang inyong pangutana pinaagi sa akong column mamatag Miyerkules, Sabado ug Domingo.