Katawhan ang nahubo-an

Ang pederasyon sa mga sugar planters sa nasud dakong supak sa panawagan ni Finance Secretary Diokno pag-liberalize sa industriya sa asukar kay mao unya kini ang hinungdan sa “kamatayon sa lokal nga industriya.” Gitumong ang liberalisasyon pagpausbaw sa buhis sa mga tam-is nga ilimnon. Pulos adunay maayong punto ang matag habig busa angayan tun-an pag-ayo sa kagamhanan. Sa natad sa liberalisasyon nga pagatugotan sa kagamhanan, aduna gayo’y dali nga maadunahan. Basin mahigmata na lang kita sa kamatuoran nga sa paghunas sa dagat sa liberalisasyon, ang katawhan diay ang nahubo-an samtang naglangoy.  Feztleeern!

suholan ug palaliton

NAGTUO ang mga ekonomista nga ang bag-o lang naaprobahan nga wage hike sa National Capital Region (NCR) nga mo-epekto karong buwan sa Hulyo, makapadangilag unya sa inflation sa nasud. Luyo ni’ng kabalaka sa mga ekonomista, nasagmuyo usab ang mga labor groups sa daw ulog-ulog lang kuno nga usbaw sa suholan nga P40.  Ni’ng maong hisgutanan, magkasumpaki kanunay ang interes sa mga magpapatigayon ug ang katungod ug dignidad sa mga mamomu-o.  Haum ang panultihon nga “Ang pag-usbaw sa suholan sa usa ka tawo, nagkahulogan usab sa pag-usbaw sa palaliton sa laing tawo.”  Muleeeng!

Bukog sa kinabuhi

Usa ka janitor sa dakong tindahan diha sa Barangay Apas, Cebu City ang gidakop sa mga security guard sa maong tindahan tungod sa giingon pagpayuhot niini sa mga bukog sa karne’ng baboy.  Nangatarungan unta ang janitor nga gisugo lang siya pagdala sa putos apan gidala gihapon siya ngadto sa Mabolo Police Station. Nagkantidad ang gipayuhot nga bukog og balor P116.38.  Dakong baligho ang kinabuhi.  Naa’y nangawat og minilyon apan gawasnon, samtang kining janitor nga nagdala lang og daw walay bili nga bukog, sayon prisohon.  Mao na’y giingon nga, “Kawat dako, libyano; kawat gamay, kalaboso.”  May’pag moligeed!

Guba nga hydrants

Segun sa taho gikan sa Bureau of Fire Protection (BFP), hapit katunga sa 220 ka mga fire hydrants sa Cebu City ang wala na mogana o ba kaha, ubos kaayo ang water pressure.  Lain kini’ng obligasyon sa MCWD nga daw ilang nataligam-an.  Dili hinuon kahibudngan kay bisan gani sa paghatag sa limpyo’ng tubig ngadto sa katawhan nga maoy nag-una’ng mando sa MCWD, wala man nila maataman.  Kon adunay sunog makatuaw na lang kita sa pag-ingon, “Ang balay naugdaw na, ang tubig sa bombero ug sa MCWD gipaabot pa.”  Pagkatoytoy!

Drug money sa eleksyon?

Gimandoan ni CPPO Director Coloner Rommel Ochave ang kapolisan ubos sa iyang buhatan sa pag-monitor sa mga incumbent nga barangay officials nga nalambigit sa illegal nga drugas ingon man sa mga narco-politicians nga manghatag og drug money agi’g suporta sa mga modagan karong umaabot nga Barangay ug SK eleksyon.  Angayan hugtan sa kapolisan ang maong kampanya.  Kon ato’ng pasagdan nga mosalida ang mga narco-politicians, basin mapuno ang atong kadalanan sa mga adik, pusher ug mga kawatan. Haum ang panultihon nga, “Kon imong suportahan ang panuway, na’n panuway ka usab.”  Madahaan!