Pag-clamp padayon

Tungod sa daghang reklamo nga nadawat sa Cebu City Transportation Office (CCTO) kabahin sa mga sakyanan nga gi-park lang sa mga karsada panahon sa gabii hangtud na sa buntag, gipaspasan ron ang clamping operations.

Dunay ordinansa ang Cebu City government nga nagdili pag-park sa mga sakyanan diha sa mga karsada, ilabi na lapas na sa tungang gabii. Dili tinuod nga namili lang ang mga traffic enforcers kon hain ang ilang himoan og operation.

Tungod sa kadako sa siyudad sa Sugbo mao nga dili gyud dayon masanong ang tanang reklamo. Ang illegal parking sa mga sakyanan sa Casals Village diha sa Barangay Mabolo, apil sa giaksiyonan sa mga traffic enforcers.

Gani, nangasuko ang mga tag-iya og sakyanan ug mihulga nga mopasaka sila’g kaso sa Ombudsman batok sa mga sakop sa Traffic Management Board ug mga traffic enforcers nga nag-clamp sa ilang sakyanan.

Para namo sa mga sakop sa Traffic Board, mas nindot nga modangop sila sa Ombudsman, o sa hukmanan, aron mahatagan gyud og tukmang husay ang isyu kabahin sa ilang dapit.

Kami sa Traffic Board, ang gibarugan namo nga basehanan nga ipang-clamp ang mga sakyanan nga giparking sa mga karsada sulod sa Casals Village kay ang mga karsada diha “public road.” Dunay ordinansa nga nagdili sa overnight parking.

Dunay dokumento nga ang mga karsada sa Casals Village gidonar ni Atty. Cecilio Casals, ang tag-iya sa village, ngadto sa siyudad sa Sugbo kaniadtong 1980.

Ang Deed of Donation sa mga road lots gipirmahan nila ni Atty. Casals ug ni kanhi mayor Florentino Solon, ug narehistro gyud kini sa Notarial Book.

Sa miting namo sa Traffic Board niadtong Martes, nagpaabot mi sa mga opisyal sa Casals Village nga mitambong aron mopasabot nganong dili angay’ng i-clamp ang ilang mga sakyanan nga mag-overnight parking.

Mangutana sab unta mi kon ang pagtukod nila sa guard house nga anaa taliwala sa karsada, duna bay construction permit gikan sa Office of the Building Officials (OBO), pero wa man sila makatunga, busy tingali.

Kon dili man makanunay ang paghimo og operation sa pag-clamp sa Casals Village, tungod kana sa kadako sa siyudad ug angay usab atimanon ang mga reklamo sa ubang dapit.

Gani, kagahapon sa kadlawon, siyam ka dugang sakyanan nga gi-overnight parking gihapon sa mga karsada sa Casals, gi-clamp na sab sa mga traffic enforcers, lain sab nga mga sakyanan ang na-clamp sa overnight parking gihapon.

Gipagasto ninyo ang Cebu City government pag-aspalto sa mga karsada sulod sa Casals Village, unya moingon mo nga ang karsada private? Unsay argumento Sir?