Mga timailhan nga anaa ikaw sa usa ka kulto

Gipaabot nila nga mamahimong magmatinud-anon ngadto kanila ang ilang mga sakop kun mga miyembro.

Ang mga lider sa kulto ang nagpaabot nga ang ilang mga tawo mamahimong magmatinud-anon kanila ug sa ilang mga pagtulon-an. Kining maong pagkamatinud-anon mamahimong ipasa hangtud na sa mga anak sa mga sakop nila. Kining maong pagkamtinud-anon ang kinahanglang pagasundon bisan pa man kun kini halayo na sa rason ug dili na gyud makatarunganon.

Ang Walay Pagtahud sa Matag Pamilya

Ang mga cult leaders walay igong pagtahud sa kabalaan o kasagrado sa pamilya. Kun buot hunahunaon ang matag pamilya dunay kaugalingong pamaagi kun unsaon nila pagmatuto ug paggalam ang ilang mga anak. Kasagaran sa mga kulto ang manghilabot gyud. Gani sila pa ang magbuot kun unsaon pagtambal ang mga kabatan-onan nga kuno gihasi sa dautang mga espritu o dili ba kaha unsaon sila pagtambal gikan sa ilang mga balatian. Ang mga ginikanan usab nga dunay dakong kalibog ang mahimong pahimuslan. Sakyan ang ilang kalibog aron mapugos ang kunohay pamaagi kun unsaon pagtambal ang mga nadaut. Mogawas ang mga tangkil tangkil kun habak bisan kun wala kini kinahanglana. Tungod sa maong panginahanglan ang usa ka tambalan nga sakop usab sa kulto ang mahimong mobuot nga kinahanglang ang mga batan-on ang ibutang sa ilang kustodiya aron kuno mahatagan og igong pagtagad. Ang isolation nga pamaagi delikado kay mahimong mapahamtang ang mga buhat nga inay makatabang, mas makadaut hinuon sa mga biktima.

Ang Pag-angkon. Kasagaran sa mga biktima ang panag-iyahon sa mga pangulo sa kulto pinaagi sa paghilo sa ilang mga hunahuna ug pagbati. Mosulod ang mga isyud kalabot sa sexual purity versus ownership. Murag ipahigmata sa mga pangulo sa bisan unsang kulto nga dunay obligasyon ang matag miyembro nga mohatag o mosanong sa bisan unsang pabor nga pangayoon sa ilang mga lider. Apil na niini ang pagpahimulos ni bisan kinsang sakop (materyal man o sexual) agig bugti sa gipasalig nga panalangin o gahum o kaayohan. Sama pananglit sa usa ka asawa nga aron siya mamaayo sa iyang gihambing balatian kinahanglang makigdulog siya sa tambalan nga mangangkon nga ang bugtong paagi sa kaayohan mao man ang pakighilawas. Bisan pa man kun nervous breakdown lang ang sakit. O dili ba kaha ang pag brainwash nga ang kaayohan dili makab-ot kun mobalhin ka og laing mananambal.

Hawa sa Simbahan

Tungod ning maong delusion of grandeur o ang pagtuo nga nahimo silang lahi ug labaw sa tanan gumikan sa pagtuo nga nakahupot sila og gahum ang si bisan kinsang sakop sa kulto o pundok sa kulto ang dili maminaw sa Simbahan kay sila mismo nagtuo man nga sila ang gahum ug dili ang simbahan. Ang ilang pagtulon-an maoy husto ug dili ang pagtulon-an sa simbahan.  Mao ang uban kanila nahimong intrusive ra kaayo mismo sa atong kalihukang liturhikal. Kini tungod kay buot nilang I establish ang ilang credentials ingon nga mas labaw pa sa pagtulon-an sa simbahan ug sa Vicario mismo sa simbahan. Mao kini ang timan-I nga bisan gani ang mga relihiyosong organisasyon sulod mismo sa Parokya nga dili gani mosubay sa gilatid sa Parokya ug sa simbahan mismo ang pagaisipon nga kulto. Kay daghan ra ba nato nga espesyal na kaayo og pamati sa kaugalingon tungod kay ang Ginoo nipakita na kuno niya ug nihatag kaniya og mensahe. Nga kuno ang Mahal nga Birhen nihatag kaniya og mensahe ug uban pang mga pangangkon. (Sumpayan)