Mas lawom nga rason?

Sulod sa taas nga panahon giuom lang sa mga mananaog sa mga gipasiugdahan nga contest sa syudad ang kapakyas sa kagamhanan pagbayad sa ilang premyo.

Dunay pipila nga nagbagulbol diha sa social media apan way nakadungog sa ilang pangagho hangtud nga naukay niadtong Lunes ang pagkainutil sa syudad pagpasiugda og mga sangka.

Naglibog man gud ko ug tingali hasta pud ang ubang sakop sa media nganong way kantidad sa premyo nga gihisgutan alang sa mga mananaog sa Barangayan sa Sugbo.

Aron pagtubag sa akong kalibog, akong gipangutana ang among reporter sa The Freeman nga si Caecent Magsumbol pilay premyo sa mga mananaog.

Matud ni Caecent dili pa makahatag og kantidad si Ernest Herrera nga maoy gitudlo nga overseer sa Barangayan tungod kay duna pa silay gihimo nga adjustment sa premyo gumikan kay gilaslasan man ang original nga budget sa Independence Day celebration gikan sa dul-an sa P11 milyones ngadto nalang sa P5M human sa grabing pagsaway sa publiko.

Kataw-anan unsa no? Asa man ka mangita nga nahuman na ang contest ug duna nay gideklarar nga mananaog apan wala pa mahibaw-i pilay ihatag nga premyo.

Dinhi akong nahibaw-an gikan ni Caecent nga dili kuno ni bag-o sa City Hall tungod kay ang mga mananaog sa milabay nga mga competition wala pa sab mabayri.

Nakurat ko sa akong nasayran hinungdan akong gisusi. Pastilan, usa sa mga midaog sa Animal Welfare Photo Contest sa Department of Veterinary Medicine and Fisheries (DVMF) niadto pang Disyembre mikompirmar nga wa gyud diay sila mabayri.

Gawas ini laing mananaog sa laing contest--First Heritage Summit Photo Contest-- mitug-an sab nga hasta sila wa sab bayri sa City Hall.

Ug ang beteranong sakop sa media nga si Sam Costanilla nagyawyaw pud diha sa Facebook tungod kay gawas nga wa pa siya bayri sa iyang talent fee isip host, wala sab hatagi sa premyo ang mga midaog sa SINEGUGMA, usa ka sangka sa lilas nga binisaya.

Human mabulgar sa media, gipahibawo dayon sa buhatan ni Bise Mayor Raymond Garcia nga maoy nagpasiugda sa Animal Welfare Photo Contest ang mga mananaog sa sangka nga makuha na ang ilang premyo kagahapon sa hapon.

Sigun sa pahibawo nga personal nga kwarta ang ibayad sa bise mayor sanglit wala pa gyud kuno irelease sa City Hall ang premyo.

Ingon ba gyud niini ka bulay-og ang mga gitahasan pagproseso sa maong transaksiyon diha sa City Hall? O dunay mas lawom nga hinungdan may kalambigitan sa politika?

Sulagma ba lang nga gawas sa Barangayan, ang mga naunang competition pulos dunay kalambigitan ang bise mayor?

Ang mga tigpaniid sa politika nagduda nga gituyo paglangay ang pagpagawas sa premyo aron pakauwawan ang bise mayor nga posibleng maoy mahimong kaatbang sa politika ni Mayor Mike Rama sa umaabot nga eleksiyon.