Religion is faith, science is fact, I prefered facts

Mao kini ang giingon ni Sheldon Cooper usa ka bata nga henyo. Usa kini ka salida. Sa maong salida dunay usa ka bata nga advance ra kaayo og kahibalo labina kun maghisgot kita og science ug mathematics.

Hasta ang ilang pastor sa Baptist Church ang nasupalpal sa iyang daghang mga pangutana. Apan sa kaulahian iyang giingnan ang iyang inahan:

“Tinuod, nga dili ko motuo og Dios apan ang science nagtudlo nga detalyado ug han-ay ra kaayo ang uniberso nga tungod niini, makaingon ta nga dunay Magbubuhat nga nagpaluyo niini.”

Nagpasabot lamang kini nga bisan pa  man kun gihigugma ni Sheldon Cooper ang Facts apan sa laing bahin duna pud siya’y pagtuo.

Kay ang uniberso mismo nga iyang gitun-an nagtug-an man nga luyo sa maong han-ay anaa ang usa ka magbubuhat.

Religion is Faith. Kini tungod kay ang mga butang ingon man ang bisan unsang buluhaton ato mang pagasud-ongon ginamit ang mga mata sa pagtuo. Nahinumdom nuon ko sa atong philosophy instructor kaniadto nga samtang sa college days sa seminaryo gamiton ang utok diha sa pagpamalandong apan kun moabot na sa theology gamiton man tuod ang utok apan pik-on pud nato ang tuhod.

Dili paigo ang paghunahuna ug pagpangita sa rason, mahinungdanon usab ang pag-ampo.

Nga kun unsa ang wala makita diha sa atong panghunahuna o rason ato untang makaplagan diha sa atong pag-ampo. Kay ang pag-ampo kahigayonan man nga mas mailhan nato ang Ginoo kun kita makighinabi kaniya adlaw adlaw.

Sa akong panaw ingon nga Kristohanon ug ingon nga pari, daw sa nakita ko ang dakong panginahanglan nga anaa gyud sa presensiya sa Dios, ning paagiha lamang mamahimong hingpit ug kuntento ang tanan alang Kanako.