BBM-SARA tandem pabiling lig-on

Pagkahimugso sa Bongbong Marcos-Sara Duterte (BBM-SARA) tandem, ang tanang isla sa Pilipinas: Luzon, Visayas ug Mindanao nga giulang sa kadagatan, daw nabuhatag mga taytayan ibabaw sa maparat-langas nga tubig sa politika, diin ang mga Tagalog, Bisaya ug Muslim, gikan sa Norte hangtod sa South, nagkahiusa sa pagsuporta sa ilang pagdagan isip lig-ong kandidato pagka-Presidente ug pagka-Bise Presidente sa atong nasod. Ug sila maoy midaog.

Ning hapit na nilang usa ka tuig nga pagpangalagad, makita sa katawhan kinsa kanila ni Inday ug PBBM ang nagsulti sa tinuod ug mituman sa unsay ilang gisaad panahon sa kampanya?

Sa pag-appoint ni PBBM og mga PNP chief, Justice Secretary ug DILG secretary namatikdan nga medyo nasipyat siya. Kay inay mopalig-on unta sa seguridad sa kinatibuk-ang dapit sa Pilipinas kining iyang gipangpili, nakahatag man hinuon og dakong kabalaka sa katawhan.

Samtang si Bise Presidente Inday, kinsa gi-appoint ni PBBM isip Department of Education secretary ug National Task Force to End Local Communist Armed Conflict (NTF-ELCAC) co-chairperson, kanunayng mipakita sa tumang katibay sa iyang baroganan. Diin bisag gitabangan pa pag-alkontra sa mga oposisiyonista, walay nakatarog. Kay kon unsay gimbuhaton nga iya nang nadesisyonan, mao gyoy matuman.

Hinungdan, dihang gipangutana si PBBM sa media kon unsay iyang reaksiyon niadtong pag-anunsiyo ni Inday og irrevocable resignation isip chairperson sa Lakas-Christian Muslim Democrats (Lakas-CMD), pulos pagdayeg ang gitubag ni PBBM.

Matud niya: “Very simple. As exactly what she says. Alam mo naman si Inday Sara is very plain spoken. Kung ano ang sinabi, yon na ang ibig sabihin niya. She has much work to do that she cannot be involved in any of the…have herself to be destructed.”

Si Inday sa iyang pagresayin sa Lakas-CMD miklaro usab, nga bisag mibulag na siya sa maong partido, magpabilin ang iyang pagpakighiusa ug pagsuporta ni PBBM hangtod sa kataposan sa ilang termino sa pagpangalagad. Pastilan, mora mag marriage vow ilang gipadangat.  Nga: “till death do us part.”

Ingon niini kalig-on ang nahiusang punoan sa BBM-SARA tandem. Gisulayan man tuod og hasmag sa kusog-mapangahasong hangin, mipakitiwkitiw sa kadahonan ug mipayangoyango sa mga sanga, pero wala gyod makatandog sa mahimsog-tiunay nilang pagkapunoan.

Pagkatahom nga relasyon. Unta, forever!