Ako Magauban kaninyo sa kanunay

Solemnidad sa Pagsaka sa Langit sa Ginoo

World Communications Sunday

Mga Pagbasa: Buh. 1;1-11/Sal. 47/Ef. 1;17-23/Mt. 28;16-20

MAAYONG BALITA

Sa katapusang higayon nagkapundok ang napulo'g usa ka mga tinun-an ni Jesus kuyog niya sa wala pa siya mosaka paingon sa langit.

Sa maong panagtigom iyang gihagit ang iyang mga tinun-an: “Panlakaw kamo sa tibuok kalibutan ug isangyaw ang Maayong Balita, Bunyagi sila sa Ngalan sa Amahan, ug sa Anak ug sa Espiritu Santo!” kuyog sa maong hagit ang pasalig: “Ako magauban kaninyo sa kanunay hangtud sa katapusan sa kalibotan!”

KASINATIAN

Lisud gyud kun ang atong gisaligan mobiya na kanato. Kining maong pagbiya maoy nakapahimo kanatong daw mga ilong twapos.

Apan sa laing bahin kining maong kasinatian maoy nakapahimo kanatong independente aron sa ingon makalakaw kita ginamit na ang atong kaugalingong mga tiil.

Bisan pa man kun wala na ang Ginoo kuyog sa iyang mga tinun-an apan padayon gihapon silang nabuhi ug nanlimbasog diha sa ngalan sa ilang magtutudlo. Sama sa kinabuhi natong mga tawo kinahanglang kita mamatay aron ang lain mahimugso.

LIHOK

Karong Dominggoha gisaulog nato ang World Communications Sunday unta mamahimo kitang hamtong sa paggamit sa mga kahimanan sa komunikasyon unta atong isangyaw ang maayong balita dili lang sa social media kondili mismo sa paghimo sa atong kaugalingon nga maayong balita ngadto sa uban.

PANGAMUY0

Ginoo makita ug masinati ka unta sa uban ngari kanamo. Amen.