Legislated wage vs RTWPB

Giduso ni Senate President Migs Zubiri sa Committee on Labor, Employment and Human Resources ang P150 nga umento sa suhoan sa mga anak sa singot.

Giingon sa presidente sa Senado nga panahon na sa sektor sa mga negosyante nga mobawos sa pagtabang human sila makapahimulos sa programa sa gobiyerno sama sa Corporate Recovery and Tax Incentives for Enterprises  Act of 2021.

Sa pagduso sa umento sa suholan gipasabot ni Zubiri nga kompara sa mga nasud sa Southeast Asia, ang Pilipinas nabiyaan na gayod kun hisgotan ang suholan sa mga anak sa singot.

Samtang ang inflation sa nasud nagsugod na sa pag-ubos ngadto sa 6.6 porsiyento niadtong Abril gikan sa 8.6 porsiyento niadtong Enero ning tuiga, ang prisyo sa mga palaliton wala gayod moubos.

Ang presidente sa Senado miingon nga langay kaayo ang Regional Tripartite Wages and Productivity Board sa paghatag og umento sa suholan ug kun mohatag man gagmay ra pod.

Apan si Secretary Arsenio Balisacan sa National Economic Development Authority (NEDA), sa briefing sa Development Budget Coordination Committee sa House Committee on Appropriations, miingon nga ang umento sa suholan nga ipaagi sa balaud makamugna kini og negatibong epekto sa ekonomiya sa nasud.

Si Balisacan nagkanayon nga ang legislated wage increase moresulta kini sa pagmahal sa export ug pagminos sa kompetinsiya sa merkado sa kalibotan hinungdan nga maapektohan niini ang kalihokan sa ekonomiya.

Gisugyot ni Secretary Balisacan ang pagbubo og puhonan sa sektor sa agrikultura aron motaas ang pagka produktibo niini kay mao kini ang nakamugna sa pagsaka sa prisyo sa mga palaliton. Aron maminosan ang epekto sa pagtaas sa prisyo sa palaliton kinahanglan nga isugal sa gobiyerno ang iyang resources ngadto sa sektor sa agrikultura. Ang legislated wage increase ni Senador Zubiri sama sa lamian nga pagkaon nga adunay hilo nga giilot ngadto sa mga anak sa singot.

Ang sugyot sa presidente sa Senado langay tungod kay moagi pa kini sama sa proseso sa pagpalabang og balaud. Gawas niini, mapolitika ang umento sa suholan hinungdan nga mosamot kalangay ang ihatag nga umento sa suholan. Disbintaha kini sa mga anak sa singot.