EDITORYAL - Modernisasyon sa Coastguard

Ang Philippine Coastguard maoy gitahasan sa pagpatuman sa mga balaod diha sa kadagatan batok sa ilegal nga panagat, smuggling, pirate ug hasta ang pagpreserbar sa soberiniya sa Pilipinas gikan sa ubang mga estado nga gustong yatakan ang katungod sa mga Pilipino nga makagamit sa mga bahandi gikan sa kadagatan sa sud sa teritoryo niini.

Apan ang PCG usa sa wala mahatagi og atensyon sa gobiyerno, partikular sa mismong ahensiya nga naghupot niini, ang Department of Transportation. Kuwang kaayo sila og mga gamit ug personnel aron mabuhat ang tanang kaakohan nga gisangon kanila.

Samtang ‘civilian in nature’ sama sa Philippine National Police ang PCG, sila maoy tigpatuman sa mga maritime laws, environmental laws, maritime safety, mga regulasyon may kalambigitan sa luwas nga pagbiyahe ug pagpanagat sa kadagatan sa sud sa Pilipinas.

Pila ra man ka buok ang barko ug patrolboats sa PCG, duna lamang kini 15 ka floating assets nga may kapabilidad pagpatrolya sa West Philippine Sea.

Ang 12 niini mao ang Parola Class patrol boats, duha ka Magbanua Class Offshore Patrol Vessels (OPV), ug nag-inusarang Gabriela Silang class OPV nga tanan napalit sa panahon ni kanhi presidente Benigno Aquino III.

Ang uban mga gagmay nga patrolboats nga kadaghanan motorized banca pangpatrolya duol lang sa baybayon. Ning agresibong mga gipangbuhat sa China gamit ang “grey zone tactics” nagkinahanglan og dugang mga dagkong barko ang PCG kung buot sa gobiyerno nga maprotektahan og tarong ang teritoyo niini nga di kinahanglang gamiton ang Philippine Navy.

Kaning taktika sa China, alang-alang matawag nga giyera ug dili sab matawag nga malinawon. Dunay tumong nga sibilyan nga barko ilang gigamit pag-insister sa ilang gusto diha sa South China Sea, kini aron dili mogamit og navy ang mga nasud nga ilang target ilogan og teritoryo. 

Pinaagi niini, malibog ang sama sa Pilipinas kung unsay angay buhaton, kung coastguard nga barko, kuwang niini ang Pilipinas, kung barko sab sa Philippine Navy tugbangan gyud kini sa China og mga barko sa Peoples Liberation Army-Navy (PLAN) ug posibleng magkagiyera.

Kaning pakigalyansa sa Pilipinas ngadto sa Amerika, Australia ug Japan alang sa joint patrol sa WPS makatabang kini og dako, apan dili maayong magsalig lang kanila. Kinahanglang mamalit ang PCG og dugang mga barko para niini.