Simbolo sa inhustisya
Sayop si Executive Secretary Lucas Bersamin. Sayop sab si Justice Secretary Jesus Crispin Remulla. Sa ilang hubad sa pagka-absuwelto ni kanhi Senador Leila de Lima. Para nila mao ang timaan nga napatigbabaw ang rule of law ug buhi ang sistema sa hustisya sa nasud.
Sukwahi ang implikasyon. Napriso na si de Lima og kapin sa unom ka tuig. Bisan way klarong mga ebidensiya batok niya. Dakong bugal-bugal sa rule og law. Ang gidugayon sa husay sa kaso nagmatuod sa kalangan. Di malalis nga timaan sa masakiton nga sistema sa hustisya.
* * *
Di makapa-goryo-goryo silang Bersamin ug Remulla. Nahibawo sila giunsa pagmaniobra ang mga kaso batok ni de Lima. Gipakauwawan si de Lima sa imbestigasyon sa mga kongresista. Nga igo lang nipaburot sa mga pasangil. Nga hapit kada adlaw nga gibalikbalik ni kanhi Presidente Rodrigo Duterte.
Dayon gisumpay-sumpay sa Department of Justice (DOJ) ug sa Public Attorney’s Office (PAO). Ang nagbaha nga mga testimoniya sa konbiktadong mga piniriso sa New Bilibid Prison (NBP). Nga nisumay-sumay lang sa bisan unsay gitudlo sa DOJ ug PAO. Aron lang makakuha og pabor sa administrasyon.
* * *
Napriso si de Lima niadtong Pebrero 2017. Tungod sa tulo ka kasong kriminal nga gipasaka batok niya. Naabsuwelto siya sa unang kaso niadtong Pebrero 2021. Naabsuwelto siya sa ikaduhang kaso sa niaging semana. Sunod buwan pa hukman. Di ang kinatibuk-an sa ikatulong kaso. Kon dili ang iya pang petisyon para sa temporaryong kagawasan.
Kon nadaugdaog nilang kanhi sakop sa Senado, kanhi DOJ secretary ug kanhi Commission on Human Rights (CHR) chairperson, unsa man intawoy dag-anan natong mga mayukmok?
* * *
Ang administrasyon ni Presidente Ferdinand Marcos Jr. di kapamostura nga tig-abiba sa rule of law. Si Remulla nipaundayon, imbes mobadlong, sa pangabuso sa niaging administrasyon. Nipasalig si Remulla nga di supakon ang pagpiyansa. Kon magpakiluoy si de Lima sa humanitarian grounds. Ug di mangangkon sa iyang ka-inosente.
Ambot naikog bang Duterte. O gusto sang mopatagam sa ubang mapangahason. Gipadayon nilang Remulla ug Marcos ang pagdumot sa kanhi presidente. Kinsa di kadawat nga babaye ang nangisog pagsusi sa mga krimen sa Davao Death Squad (DDS). Sa wa pa palapdi ang laktod nga pinatyanay sa tibuok Pilipinas.
* * *
- Latest
