Tinun-an nga nag-vandal sa pader gipasakaan og kaso

CEBU, Philippines —  Gipasakaan na og kaso ang usa ka tinun-an sa Grade 8 sa siyudad sa Lapu-Lapu nga nag-vandal sa pader sa Barangay Ibo nga gipaubos karon sa Home Care Center for Children sa Barangay Gun-ob.

Padayon karon sa iyang community service ang maong batan-on nga maoy agig silot sa kalapasan nga iyang nahimo.

Natigayon ang pagkasikop sa maong tinun-an human usab sa paghatag og kasayuran ni Mayor Junard “Ahong” Chan sa iyang facebook page pinaagi sa pagpakita sa hulagway sa gihugaw hugawan nga pader gamit ang itom nga pintal.

Ang social media page sa mayor ni post sa hulagway sa vandal nga nakakabig sa atensyon sa usa sa mga classmate sa suspetsado.

Human sa pakig-alayon sa informant ang page administrator naka-ila na gilayon sa nag vandal.

Matud pa sa staff sa Home Care ang maong batan-on nihimo ug community service niadtong April 28 tungod sa iyang unang kalapasan nga nahimo, apan napulo ka adlaw human niini nihimo na usab siya ug ikaduha nga pag vandal.

Ang staff nipasang-at ug kaso batok sa maong batan-on tungod sa kalapasan niini sa City Ordinance batok vandalism nga adunay multa nga P67mil.

Samtang ang informant nakadawat ug 30mil agig reward sa pagtabang aron masikop ang suspek.

Una niini si Mayor Chan mitanyag og ganti nga P30,000 alang niadtong makahatag og kasayuran sa mga nakahimo og kalapasan sa ordinansa batok sa vandalism. - Romeo T. Limpangog, MEL (BANATNEWS)