Ang banig

Pangilin kadto ni San Jose mamumuo patron sa among Parokya. Dunay mga bugas nga gipanghatag courtesy ni Jeje Coca Barnes.

Daghan gyud tong nahatagan ug nianang pagkahapon na dunay  namaligyaay og banig nga nipaduol aron mangayo og bugas.

Nakita ko sa mga mata sa maong edarang babaye ang kamatinud-anon. Alang niya mahinungdanon kaayo ang bugas. Daw sa wala ako makatingog sa maong  sitwasyon.

Akong nakita ang akong kaugalingon niadtong panahon sa dakong panginahanglan. Kadtong panahon nga bisan gani ang sud-an ug kan-on usa man ka dakong kalisdanan.

Nanumbalik kadtong mga panahon nga doble kayud gyud aron dunay matampo sa banay nga nagkinahanglan.

Kanindot unta kun magtinabangay lamang apan dili kita makapaabot niana. Dunay mga sakop sa pamilya nga sa panahon sa kaabunda malipayon sila kaayong moambit sa imong grasya.

Apan panahon sa kapaitan dili man sila molingi sa imong kahimtang. Nahinumdom ko kaniadto nga naglain ang akong tiyan gisangpit ko ang akong manghod apan nagpakabuta bungol lamang.

Mao nga nibangon ko ug nag-init og tubig suko pa kadtong apohan kong nitaliwan kay nabungkag ang iyang tabliya.

Gikan niadto nausab sa hingpit ang akong baruganan: “Kun dili ka kuyog sa akong pag-antos walay rason nga mahimo kang kabahin sa akong kalampusan!” ug diha sa pagtabang wala na lang gyud ko magpaabot og balus pa.

Daghang tinabangan nga dili na magtalinga kun maunsa ka sa umaabot. Apan unsaon ta man ingon ana ang kinabuhi.

Dunay mga uyoan nga modapit Kanako matag pasko ngadto sa ilang puluy-anan abi nako og regalo pahugason ra diay og plato. Inig uli ipamugos pagpadala ang mga ginamo.

Nakaamgo ko nga managsama lang kitang tanan ug kun unsa ang atong makaon mao usab ang sa uban.

Ang maong babaye nakapahinumdom Kanako sa akong kapobrehon.

Kay nahatagan man og kahigayonan aron makaalagad ako naningkamot nga makalagad ug makapaambit, gihatag nako ang bugas Dungan sa pag-ingon: “Nay diay pakapin nga pan!”

Ang banig nga iyang gidala dala iyang gihatag Kanako. Wala diay sa pagkaanaa ang pagkamanggihatagon. Usahay diha sa atong panaw ang mga kabus baya usab ang manggihatagon kaayo sa walay igong pagpinig.