Buslot sa SIM registration
Nag-ambak-ambak karon sa kalipay ang trolls ug scammers. Bisan sa SIM Registration Act, makapatuyang gihapon sila sa pag-ilis-ilis og mga numero sa SIM cards aron pagpakauwaw, pagpanghudlat, pagpangilad ug pagpangilkil sa ilang mga biktima. Tungod sa bag-ong lagda nga ipatuman sa extension sa rehistrasyon sa mosunod nga 90 ka adlaw.
Gipahibawo ni Secretary Ivan John Uy sa Department of Information and Communications Technology (DICT) nga di na maproblema ang subscribers nga way government ID. Kay tugotan na sila nga makagamit sa ID nga luwatan sa ilang mga barangay.
* * *
Ang barangay ID wa maapil sa orihinal nga lista sa balidong IDs nga gitugotan sa Implementing Rules and Regulations (IRR) sa Republic Act No. 11934: PhilSys National ID, Driver’s License, UMID, SSS/GSIS card, Senior Citizen’s Card, Passport, Police Clearance, NBI Clearance, Firearms License, PRC ID, Voter’s ID, IBP ID, TIN ID, OWWA ID, PWD card, Government ID, o School ID (para sa mga bata).
Kon tugotan ang barangay IDs, unsaon pagbaraw ang troll farms ug scammers pagkopya sa IDs sa ilang paboritong mga barangay nga wa mahibaw-i unsay security features?
* * *
Sa kataposang ihap, dunay 42,047 ka mga barangay sa tibuok Pilipinas:
• Duna bay lista ang telcos sa mga ngan sa tanang barangay (ug mga lungsod ug syudad nga ilang nahimutangan) ug sa 42,047 ka mga barangay kapitan?;
• Makahimo bang telcos pag-ila sa katinuod sa mga pirma sa mga kapitan ug ubang opisyal sa barangay?; ug
• Makahibawo bang telcos sa kalainan sa tinuod nga barangay IDs ug sa mga gi-drowing lang sa Canva ug ubang apps?
* * *
Mapagarbuhong gipublikar sa mga barangay ang sampol sa ilang IDs sa social media platforms aron pagdasig sa mga molupyo pagkuha og IDs nga mahimong ma-renew kada tuig. Unsaon pagpugong ang pag-retoke sa mga sampol aron masapawan gatosan o kaliboan ka pekeng ngan ug letrato ug maoy i-upload sa telco websites isip proof of identity?
Nakapait mao nga ang labing kabos nga mga barangay, sa pakisusi sa telcos, igo rang makaluwat og barangay certificates kay way katakos paghimo og IDs. Salamat ning higanteng buslot, ang trolls ug scammers mahimong mas una pang marehistro kay sa lehitimong subscribers.
* * *
- Latest
