Pinaka-'last' na

Giaprobahan sa Presidente ang paglugway og dugang 90 ka adlaw ang mandatory SIM registration. Sa talaan sa DICT, aduna’y  49.31% o 82 milyones pa lamang ka SIM ang narehistro sa mokabat 168 milyones nga aktibong SIM sa Pilipinas.  Kinaiya na gyud tingale nato ang ka-langaylangayon. Dili lang sa SIM registration adunay extension. Masinati usab kini kon mag-inom ang barkada. Inay mopauli na kay di na makaya, paimnon pa og dugang dayon ingon nga “last bottle”. Unya aduna pa diay “pinaka-last;” ug lain pa gayud nga “pinaka-last na gyud.” Naa pa gyu’y “kina-lasan.”  Himan-himan, sa kanal natikangkang.  Pagkatoytoy!

Tingog sa hulmigas

Supak si Cebu City Mayor Michael Rama sa proposal sa Konseho nga temporaryo’ng ibalik ang online classes tungod sa labihan ka init nga panahon. Alang sa mayor, kon walay face-to-face nga klase, magyampungad lang ang mga tinun-an sa computer. May punto ang mayor ug nag-base usab ang iyang pagsupak sa tinuoray nga kasinatian. Kon ipugos gyud nato ang online classes, walay duda nga makasinati na usab ang mga estudyante og daghang sayop sa modules sama sa “unsay tingog sa hulmigas og wati?” o ba kaha “matching type nga pasulit kabahin sa kolor apan ang module nga gigamit napatik sa black and white.”  Fezteleern!

Ayuda aron mo-eskwela

Miawhag si Bise Presidente ug Education Secretary Sara Duterte sa mga ginikanan ug lokal nga kagamhanan nga ipa-seguro nga ang tanan’g mga kabataan makatambong gayod sa mga tulonghaan.  Dili kinahanglan ang maong awhag. Sayod ang tanan, nga damgo ug tinguha sa tanan’g ginikanan nga makatapos ang mga anak sa pag-eskuwela apan ang kakabos maoy makapakgang. Maayo pa tingale manghatag ang gobyerno og bugas ug sardinas sa mga tinun-an nga motambong sa klase. Sa ingon’g paagi, naa na’y makaon ang banay sa estudyante, ma-engganyo pa ang bata sa pag-eskwela tungod sa ayuda.  Muleeng!

Bioderm batok bronco rub

Sa may kalambigitan’g balita, nanawagan usab si Bise Presidente Sara Duterte sa mga estudyante nga magbaton og kaluoy ngadto sa ilang mga klasmet nga dili pa maantigo mobasa.  Inay himoon sila’ng kataw-anan, angayan nga sila tabangan ug tudloan.  Makapahinumdum kini sa among silingan nga among gipabasa sa ngalan sa produkto nga nahipatik sa kalendaryo.  Inay “BIODERM” ang iyang litokon, tungod ba kaha kay gibasehan ra man ang hulagway, “BRONCO RUB” man hinuon ang nalitok sa bata.  Atala lageee!

Tas-an ang pailob

Misugyot ang Manila Waterworks and Sewerage System sa mga kagamhanan’g lokal nga mopalabang og ordinanasa nga temporaryong magdili sa paggamit og mga inflatable pools ingon man sa mga car-washing business kay mogamit kini og daghang tubig.  Kon tukion pag-ayo nato ang sugyot, sama ra nga gidid-an ang mga tindahan pagpaninda og mga inflatable pools ug nga paundangon ang mga car-washing business nga moresulta unya sa pagka-standby sa mga trabahante niini.  Makapahinumdum ang sugyot sa MWSS sa panultihon nga, “Gisagolan sa Diyos ang katawhan og mga hanggaw aron sulayan ang gitas-on sa atong pailob.”  Madahaaan!