National ID unta maoy solusyon

Ang Department of Information Technology (DICT) mipahibawo nga di nila lugwayan ang SIM registration nga matapos karong Miyerkules, Abril 26.

Sigun sa gimbut-an sa Republic Act  11934 o SIM Registration Act, ang tanang tag-iya og cellphone gihatagan og 180 ka adlaw sugod niadtong Disyembre pagparehistro sa ilang SIM.

Ang talaan sa DICT nagpakita nga niadtong Marso 30 aduna lay 32.27 porsiyento o 54,700,899 sa 168,977,773 ka kinatibuk-ang gidaghanon sa mga naggamit og SIM dinhi sa nasud.

Ang nag-unang hinungdan nganong daghan pa ang wala makaparehistro sa ilang SIM mao ang kakuwang og valid ID nga maoy pangitaon aron ka makaparehistro.

Dili tanan dunay ID gikan sa gobyerno nga magamit aron isuporta sa pagparehistro sa ilang SIM.

Labi pa gyud intawon sa mga kabus nga way mga trabaho ug kadtong tua sa kabukiran. Nakasabot sab hinuon ko sa baruganan sa DICT tungod lay bisan pa og atong lugwayan ang deadline wala gihapon kini kapuslanan sanglit wala man gyuy valid ID ang kasagaran nga wala makaparehistro.

Hangtud nga wa silay ipakita nga valid ID dili na sila makabaton pa og kaugalingon nga SIM gawas lang og amendahan ang balaod og dili na pangitaan og valid ID ang mga moparehistro.

Apan kun kini atong buhaton ma way nada ang tumong sa balaod.

Ang balaod namugna isip paagi sa gobyerno pagsanta sa mga kriminal nga mogamit og SIM sa ilang illegal nga mga kalihukan sama sa scam o pagpangilad.

Kun registrado ang tanang SIM sayon ra alang sa mga biktima ug sa mga awtoridad ang pag-ila sa kriminal.

Nasulbad unta ang problema sa pagparegistro sa SIM kun dili pa inutil ang ubang ahensiya sa gobyerno pagtuman sa ilang tahas.

Ang kuwang og valid ID nasulosyonan unta kun epektibo pa ang pagpanghatag sa Philippine Statistics Authority (PSA) sa national ID.

Pinaagi sa national ID ang tanang Pilipino duna gyud untay valid ID. Apan unsaon nga labihan ka inutil sa PSA pagpatuman sa national ID system.

Ang SIM registration ni highlight sa kainutil sa atong pagpangisyu og national ID. Pananglitan ang akong national ID hangtud karon wala moabot kapin na sa duha ka tuig sukad ko ni apply.

Ambot unsay problema sa PSA nga ang simple nga pagpanghatag og ID dili man nila mahimo og tarong!