Ang gamot laroton

Gitambagan ni Department of Interior and Local Government Secretary Benhur Abalos Jr. ang napulo ka tag-as nga opisyal sa nasudnong kapolisan sa pagbiya lamang sa kasamtangan samtang giimbistigaran pa ang suway nga pagtabon sa gihimong operasyon batok sa gidili nga drugas diin usa ka sarhento sa kapolisan ang nakuhaan og moabot sa P6.7 ka bilyon nga balor sa gidili nga drugas nga shabu.

Ang kuha sa CCTV nagpakita nga lahi ang asoy sa hitabo kay sa gisumitir nga taho sa mga sakop sa Police Drug Enforcement Group nga gipangulohan ni Heneral Narciso  Domingo.

Una nang gipasumitir sa ilang boluntaryo nga pagbiya sa ilang katungdanan ni Secretary Benhur Abalos Jr. ang mga polis nga nagranggo og heneral ug koronel tungod sa pagkalambigit sa pipila kanila sa gidili nga drugas.

Ang suliran sa drugas dili sayon nga masulbad bisan pa og pangpatyon ang tanan nga nalambigit niini, kana kun dili gyod malarot ug malukat ang gamot niini.

Ang suliran sa gidili nga drugas dili lang kini isyu nga pang ekonomiya, politikal ug sosyal kondili naglambigit usab kini sa isyu sa palibot (environment) ug gigikanan (heredity).

Sa isyu nga pang ekonomiya, nakatampo og dako ang kakabus sa suliran sa gidili nga drugas. Ang kalayo sa mga ginikanan sa ilang mga anak tungod kay nanginabuhi sa layong dapit ingon man ang impluwensiya sa media ug ang pag-ubos sa gaway sa moralidad mga isyu nga sosyal nga nakatampo usab sa suliran sa gidili nga drugas. Ang mga patakaran nga gipatuman, mga balaud mahitungod sa gidili nga drugas ug ang pagpatuman niini, mga isyu nga pangpolitikal nga gikinahanglan nga estriktong ipatuman aron masulbad ang suliran sa gidili nga drugas.

Apan mas masulbad seguro ang gihisgotan nato nga suliran kun ang atong palibot ug atong gigikanan palig-onon sa pagpakigbatok sa suliran.

Ang pamilya maoy una nga sulbad sa gidili nga drugas ingon man ang iyang  palibot.