Pagpamalandong sa Malangkubong kaayohan

Amahan sa imong mga kamot, gitugyan ko ang akong espiritu

Hapit na mabugtoi sa iyang gininhawa ang atong Ginoo. Hapit na motikyop ang kahayag ug sa iyang pagpiyong sa iyang mga mata nahimong hilom ang tanan alang kaniya. Kamatayon butang nga dili mahimong kalikayan ni bisan kinsang tawo. kamatayon nga moabot gyud sa atong kinabuhi sa mga panahon, sirkumstansiya, pamaagi nga wala nato damha ug paabota. Ang atong Ginoo nasayud ba siya nga mamatay siya? Kun ang iyang mga kaaway tua sa Jerusalem nagkapundok nganong iya  mang gituyoan ang maong kahigayonan? Ang politikanhong kagubot niadtong panahona mao man ang usa sa mga nakatampo nga naningkamot ang mga kaaway ni Jesus nga siya patyon. Naglangkob kin isa mga pangulong pari, mga magtutudlo sa Balaod ingon man ang mga pariseo  nga nahalangan sa pagtulon-an ni Kristo Jesus. Alang kanila siya ang hulga sa seguridad sa tibuok katawhan kay pinaagi kaniya basin unya mosulong ang mga Romanhon ug laglagon ang siyudad. Mao nga siya nalansang sa Krus. Apan ang maong kamatayon sa krus wala man magpasabot og kapukanan. Hinunoa nahimo kadtong sinugdanan sa mas halayong panaw aron mas mamantala ang paghari sa Dios. Duha ka libo na ka mga katuigan ang nilabay.

Amahan ko sa Imong mga kamot gitugyan ko ang akong Espiritu mga tuwaw sa pagsalig ug pagtahan ngadto sa tinubdan sa kinabuhi nga kun ato pa kadtong pag-ampo makaingon kita: “Amahan dili na nako kaya! Surrender nako! Mao nga gihalad ko lang akong kinabuhi, kay dili na nako kaya! Lisud na kaayo! Apan ang gihimo ni Jesus nagpasabot ba og pagsibog? Ang tubag dili. Gipakita ni Jesus nga ang tanan dunay kinutoban aron pinaagi sa maong pagpangangkon mas makaklihok ang Dios sa atong kinabuhi sanglit ato mang gipakita ang atong masaligong paglaum nga human sa kamatayon anaa man ang kinabuhi. Ang kamatayon mao man ang atong pagkahimugso padulong sa imortalidad. Ang paghangop sa  kamatayon usa man ka matang sa pagpangandam sa taliabot nga mga panghitabo.

Apan lahi ang kamatayon ni Jesus. Sa maong kamatayon nahimong nagbunga kini og kinabuhi alang kanato. Ang Ginoo namatay aron kita mabuhi. Ang Ginoo  namatay aron kita maluwas. Kay unsaon ba gud nato pag-atubang ang kamatayon?

1.  Ang pagkamatinud-anon sa kaugalingon. Daghan kanato ang nahimong mga bakakon sa atong kinabuhi tungod kay dili tanang tawo anaa sa kamatuoran ang uban kanila anaa sa bakak ug nahimo silang komportable niini.

2. Ang pagpuyo nga halayo sa pagmahay. nganong nagmahay man? Tungod kay wala nila subaya ang dalan nga alang gyud unta kanila. Wala himoa ang mga butang nga angayang himoon unta samtang may panahon pa. kinit ungod kay kausa lamang kita moagi ning kalibutana.  Busa angayan lamang nga wala kitay pagausikan.

3. Ang pagpuyo  diha sa Gugma. Ang gugma dili lang pagbati. Ang gugma usa ka desisyon nga atong himoon adlaw adlaw sa atong kinabuhi.

4. Ang paghatag og Bili sa Kasamtangan. Ang panaw padulong sa kahingpitan ug kabalaan kinahanglang pagahimoon karong adlawa ug dili ugma kay ang ugma wala namay kasegurohan. Ang simbahan ingon nga nagapanaw kinahanglang magtuman sa iyang tahas ug kaakuhan ingon nga Asawa ni Kristo ning panahon sa Kasamtangan. Ang husto nga mga lakang sa kasamtangan mao man ang sukaranan sa kaugmaon.

5. Ang Paghatag kaysa Pagdawat. Ang pinakanindot nga atong mahatag samtang buhi pa kita mao man ang atong panahon. limitado ra kaayo ang atong panahon ingon nga tawo busa angayan lamang nga atong tarungon ug himoong mabulokon ang atong kinabuhi. Diha lamang sa paghatag kita mamahimong malipayon.

Amahan sa Imong mga Kamot Gitugyan ko ang Akong Espiritu! Ang Dios maoy tag-iya sa atong kinabuhi ug siya lamang ang dunay katungod sa pagkuha niini. Siya lamang ang dunay gahum sa paghunos niini. Gigasa niya ngari kanato ang maong kinabuhi busa angayan lamang nga atong ampingan ug palipangon ang bisan unsang gisangon sa Dios ngari kanato. What you are is God’s gift to you what you will become is your gift to God!