Balita Sagol Panahom

"No money, no honey"

Hugtanon ang pagbabag sa COCOPEA sa balaodnon nga “No Permit, No Exam Prohibition Act” nga anaa na karon sa Senado ug sa Kongreso tungod kay makaapektar kuno kini sa pagpangolekta sa tuition fee ug uban’g bayronon sa estudyante ug mahimong moresulta sa pagpanira sa mga pribadong tulonghaan. Nagkabangi ang interes tali sa mga estudyante ug sa mga tag-iya sa eskwelahan ni’ng kahimtanga busa kinahanglan tun-an kini pag-ayo.  Makapahinumdum kini’ng balaodnon sa duha ka polisiya nga gipatuman sa asawa sa iyang bana. Ang una mao ang “No Money, No Honey” ug ang ikaduha mao ang “Money down before panty down.”  Pagkatoytoy!

Walay ‘common sin’

Mohimo’g kausaban sa immigration procedures ang Inter-Agency Council Against Trafficking (IACAT) human sa nasinati nga mga reklamo sa naghinubra ka estrikto nga departure protocols nga gipatuman niini.  Dili man tingale ang mga lagda ang hinungdan sa maong bulilyaso kon dili ang pagsabot ug pamaagi sa pagpatuman niini.  Daghan sa kagamhanan ang mopasiatab ug mopasundayag gilayon sa ilang gihuptan nga gahum aron lamang mapakita nga sila hawod.  Tataw nga ni’ng mga binuhatan sa mga immigration officers, nahanaw na kanila ang gitawag sa among silingan nga “COMMON SIN” (common sense).  Fezteleern!

Ipanglabay na lang

Tungod sa naghinobra’ng suplay, ang mga mag-uuma sa nagkalainlaing probinsiya mihukom nga ipanglabay na lang ila’ng mga abot samtang ang uban gipanghatag na lang aron malikayan ang dugang pagka-alkanse.  Kon magkulang ang suplay, modangop dilayon ang Department of Agriculture (DA) sa importasyon.  Apan karon nga maghinobra ang suplay, naglibog pa ang DA kon unsa’y angay buhaton. Ni’ng ka-inutil sa DA pagsulbad sa suliran aron matabangan ang mga mag-uuma, misugyot ang akong amigo nga “i-apil na lang ang mga opisyales sa DA sa gipanglabay nga mga produkto kay parehas ra man sila nga nangalatâ na ug wala na’y pulos.”  Madahaaan!

Mangita’g Sayop

Tungod sa pagduda nga adunay sulod nga kontrabando ang duwaan nga eroplano nga dala sa usa ka OFW nga gikan sa Hong Kong, gibungkag kini sa tag-Bureau of Customs apan namatud-an nga wala diay kini sulod ug nga sayop ang maong pagduda. Tinuod nga gimbuhaton sa BoC ang pag-utingkay aron masuta kon wala ba’y dala’ng kontrabando ang pasahero apan ni’ng maong kapalpakan, mora’g nahaum ang ilang gibuhat sa panultihon nga, “Mangita gayud og sayop kadto’ng mga madudahon bisan kon anaa pa sila sa paraiso.”  Muleeeng!

Dili magpili

Adunay gipalabang nga ordinansa ang Cebu Provincial Board nga magsilot niadtong mga opisyal ug empleyado sa nasudnong kagamhanan nga mo-insister pagpatuman sa mga nasudnong polisiya, programa ug mga proyekto nga wala pa’y pagtugot sa lokal nga kagamhanan.  Wala magsalig ang Probinsya sa Sugbo sa mga nasudnong proyekto kay adunahan man kini ug may katakos pagpatuman sa iyang mga proyekto sa kalamboan. Apan sa mga lungsod nga naglisod sa pundo, gihangop kini’ng mga proyekto sa nasudno’ng kagamhanan kay lagi ginaingon man nga, “Dili angay magpili ang makililimos.”  Saoonz!