Mga armas gilubong

Kadaghan sa mga armas nga nakuha sa mga polis dihang gironda nila ang intosan sa mga tubo nga gipanag-iya ni kanhi Negros Oriental governor Pryde Henry Teves.

Ang kanhi gobernador igsuon ni Kongresista Arnolfo Teves (Negros Oriental 3rd District) nga gipasanginlan nga mastermind sa pagpapatay kang Negros Oriental Roel Degamo.

Nakadawat og report ang PNP Criminal Investigation and Detection Group (CIDG) nga adunay daghang armas nga gitagoan sa sugar mill nga iya ni Pryde Henry Teves sa lungsod sa Sta. Catalina.

Abi ninyo, huwes sa Mandaue City ang gikuhaan og search warrant sa CIDG aron gyud nga dili mahibaw-an ang plano nila nga rondahon ang HDJ Tolong compound.

Ang ronda nga gisugdan paghimo kaniadtong Biyernes sa buntag, giingong nagpadayon pa hangtud karon, kay migamit na ang mga polis og backhoe aron nga makuha ang mga armas nga gipanglubong sa yuta.

Kaniadtong Biyernes lang nakakuha ang CIDG og unom ka rifle sa lainlaing kalibre, siyam ka pistola sa managlahi gihapon nga kalibre, 9,65 ka bala, 45 ka magazines sa lainlaing armas ug kapin sa P18 milyones nga kwarta.

Wa hinuon didto sa compound ang kanhi gobernador dihang gironda sa mga polis ang iyang intosan sa mga tubo.

Unya kay nagtuo man gyud ang kapolisan nga daghan pa’ng armas nga gitagoan ra sa compound, kay gilubong kuno sa yuta, migamit sila’g backhoe aron pagkubkob sa yuta.

Pastilan, pagka Domingo, ang CIDG nakaugkat og laing unom ka Improvised Explosives Devices nga magamit sa pagpaulbo, ingon man naugkat nila ang usa ka Rocket Propelled Grenade (RPG) ug uban pang armas.

Ang pangutana, nganong gilubong man kadto didto? Kinsa man kaha ang tag-iya sa maong mga armas ug nagpalubong niini sa yuta?

* * *

Kining pagkakaplag sa daghang armas gikan sa property ni kanhi governador Pryde Henry Teves ug kadtong pagkasakmit sa laing daghang armas gikan sa mga balay ni Kongresista Arnie Teves, magsilbi unta nga basehan sa kapolisan nga paspasan pa nila ang paghimo’g kampanya batok sa mga private army.

Ayaw ko og ingna nga ang maong mga armas, huptan lang og usa ka tawo? Daghan gyud nga mga tawo ang mogunit niana, ug unsa may gitagan-an sa Rocket Propelled Grenade?

Ang maong matang sa explosive dili gyud mapalisensyahan og mga sibilyan. Aw, hinuon, si Pryde Henry Teves  hatagan pa og higayon nga matubag niya kining maong kaso unya.

Pero lisud katuohan kon ingnon lang niya nga wa siya kahibawo kon kinsa’y tag-iya sa mga armas nga gilubong sa compound kay ang maong dapit gibantayan kanunay sa iyang mga gwardya.