Moralidad batok “due process”

Nagtuo si kanhi Chief Presidential Legal Adviser Salvador Panelo nga nakahimo og dakong kalapasan sa “due process of law” ang Kongreso sa pagsuspende niini sa kongresista nga si Arnolfo Teves, Jr. Mahimong may punto si Panelo apan dili nato hikalimtan nga katungod ug gahum sa Kongreso ang ilang gibuhat. Ug kini napadayag sa boto sa Kongreso sa pagsuspenso nga 293 ang pabor ug zero (0) ang dili. Angayan tamdan ni’ng kahimtanga ang panultihon nga “Ang balaod kanunay nga gibase sa konsepto sa moralidad, ug kon ang maong moral nga balaod, ibale-wala lang tungod sa konsepto sa “due process,”  mahimong kawang ang tanan.” Muleeng!

Sustenihan aron ‘sustainable’

Naglaraw ang kagamhanan sa dakbayan sa Sugbo nga mopahigayon og usa ka Food Security Summit nga pagatambongan sa mga NGO, mag-uuma ug ubang buhatan sa kagamhanan sa tumong nga makahimo og usa ka Food Security Master Plan. Maanindot bisan dili bag-o ang maong laraw. Mahinumduman nga gilunsad sa nasudnong kagamhanan kanhi ang “Masagana 99” sa mao gihapon nga katuyoan. Dili kakulang sa laraw ang suliran kon dili ang “sustainability” o malungtaron nga pagpatuman niini. Matud pa bitaw, “Ang kataw-anan sa mga programa kabahin sa “sustainability” mao nga kinahanglan nga imo kini’ng sustenihan.” Fishkots!

Beer inay tubig

Tungod sa nagsingabot nga El Nino phenomenon sa uwahing bahin ni’ng tuiga, giawhag sa National Water Resources Board ang katawhan sa pagdaginot sa tubig. Ang pagdaginot sa tubig, usa ka mahinungdanon nga hiyas sa maayong lungsoranon. Apan dili hikalimtan nga dako pa ang bulohaton sa kagamhanan aron madala ang tubig ngadto sa matag kabalayan. Hinuon, bisan wala pa ang awhag sa NWRB, dugay na’ng nagdaginot sa tubig ang akong higala’ng abogado. Inay tubig ang iyang imnon, BEER na man ang iyang ipadundon human og kaon ingon man sa higayon nga siya uhawon. Pagkatoytoy!

Dili angay ipiyal

Alang sa mga business groups, angayan konsiderahon sa senado ang dako nga galastohan ingon man ang epekto niini sa mga kasamtangan’g ekonomikanhong reporma sa ila unya’ng pagdiskutir sa pag-amendar sa Konstitusyon. Gibana-bana sa NEDA nga mokabat sa 14 bilyones ngadto sa 28 bilyones ka pesos ang magasto kon ipahigayon na ang constitutional convention. Sa kadako sa galastohan sa con-con, haum ang panahom nga “ang politiko andam moulâ sa kinabuhi sa katawhan alang sa iyang nasud.” May punto usab ang pagya nga “Ang pamolitika usa ka seryoso nga butang nga dili angay ipiyal lang ngadto sa mga politiko.” Madahaan!

Suntok sa buwan

Makig-alayon ang COMELEC sa NBI sa ilang pagpatuman sa “Task Force Kontra Bigay”, ang kampanya batok sa vote-buying ug vote-selling. Bisan unsa na lang ang nahuna-hunaan nga solusyon sa COMELEC aron mapakgang ang maong bisyo apan wala gayod kini masanta. Dili pagpanakop lang ang solusyon kon dili nagkinahanglan kita ug mga matinud-anon nga politiko (nga imposible) ug mga edukado ug mabuot nga botante. Ni’ng kampanya sa COMELEC batok sa vote-buying, sama ra nga nagsuntok sila sa buwan, o ba kaha “naglana og potot.” Pagkatuytoy!