Ug nihilak si Jesus

Mga Pagbasa: Ez. 37;12-14/Sal. 130/Rom. 8;8-11/Jn. 11;1-45

Maayong balita

Ang Betania usa nga ka balangay kang kansang kahulogan: “Balay sa mga Kabus” tua nagpuyo didto ang tulo ka mga managsuon. Si Marta, Si Maria ug si Lazaro. Mga suod sila ni Jesus ug gani sa matag higayon nga mahiagi siya niadtong dapita ang atong Ginoo mohapit gyud. Sa dihang nasayud si Jesus nga nagdaut si Lazaro wala dayon siya magpiskay sa pag-adto. Sa dihang namatay na ang iyang suod nga higala nagpabilin pa gyud siya og laing upat ka adlaw una pa siya niadto. Ug sa iyang pag-abot giingnan siya ni Marta: “Kun dinhi ka pa Ginoo dili unta mamatay ang akong Igsuon!” ug sa dihang wala pa maabli ang lubnganan wala kapugni ni Jesus ang paghilak. Human niini iyang gimandoan si Lazaro: “Lazaro gula ngari!”

Kasinatian

Dili lalim nga mamatyan labina kun mahal kaayo nato ang nitaliwan. Labaw na kun ang namatay maoy atong gisaligan sa panginabuhian. Guol kaayo ang duha ka mga managsuon nga si Marta ug Maria. Patriarchal ang katilingban kaniadto. Si Lazaro ang nanginabuhi alang kanila kay siya man ang lalaki. Ang iyang kamatayon nagdala gyud mas dugang kabug-at alang sa mga babaye niyang  mga igsuon. Kun si Jesus nihilak agi’g pagpakita sa iyang dakong pagbati alang sa iyang mga higala ug kang Lazaro gyud mismo nagpaila lamang kini nga mahinungdanon diay ang kalambigitan kay sa bisan unsang mga butang. Unta kita magkat-on aron mamahimo kitang mobati ug mosinati kun unsa diay kasakit ang mabiyaan sa mahal sa kinabuhi.

Lihok

Dili kahuyang ang paghilak hinunoa paagi kini sa pag-angkon nga dunay mga higayon nga dili mamakak ang atong pagbati labina sa mga panahon nga kita masakitan ug magbangotan. Ang paghilak ni Jesus dili katapusan, ang iyang paghilak sinugdanan lamang aron si Lazaro mabuhi. Kay ang Ginoo dili Ginoo sa mga patay kondili sa mga buhi!

Pangamuyo

Ginoo, adunay mga higayon nga lisud tugkaron ang imong kabubut-on. Dunay mga higayon nga bugtong ang paghilak lamang ang among mahimo. Walay molungtad gawas sa imong gugma. Dunay mga higayon nga magpabilin kang hilom diha sa among mga yangongo apan sayud kami nga ikaw uban kanamo ug nihilak ka sa mga higayon nga kami mohilak. Nalipay ka sa panahon nga kami nalipay. Salamat Ginoo sa panaghigalaay ug sa kinabuhi. Amen.