Ayaw pangilkil,ayaw pasuborno

Ang mga traffic enforcers maoy atong gitugyanan pagpahapsay sa dagan sa mga sakyanan diha sa kadalanan, mao nga kanunay gyud sila nga giyahan sa tukma nilang trabaho.

Sayo kaayo nga mibangon si Cebu City Mayor Michael Rama kagahapon sa buntag aron mohatag og mensahe sa mga traffic enforcers nga nadestino sa south sector.

Gipahinumdoman sa mayor ang mga traffic enforcer nga motrabaho gyud sa pagpahapsay sa trapiko, unya likayan gyud ang pagpangilkil sa mga driver ug dili gyud magpasuborno.

Kami sa Cebu City Traffic Management Committee giawhag gyud namo ang mga traffic enforcer nga ang pagpahapsay sa dagan sa mga sakyanan ang una nilang katungdanan.

Ikaduha lang nila nga tahas ang pagdakop kon adunay mga motorista nga dili gyud motuman sa balaod, apan dili kay ang enforcer magtago-tago aron lang gyud siya makadakop.

Dunay mga enforcer nga magpasalipod sa mga poste, sa mga kahoy, aron huwaton nga ang driver makahimo og sayop aron iya dayong nga parahon.

Ang uban sab nga mga traffic enforcers mopara og sakyanan unya dili ipadaplin sa karsada nga makabalda na hinoon sa mga mangagi nga sakyanan.

Kining matanga sa mga traffic enforcers kuwang pa og seminar. Kon mopara gani mo og sakyanan aron sitahon ang driver, adto sa daplin pahunonga.

Unya, pasabta dayon sa iyang sayop nga nahimo ug kon pwede ra mapasaylo, hatagi og konsiderasyon. Kon gusto nimo nga isyuhan og tiket, isyuhi dayon nga way daghang estorya, unya balik dayon sa imong pwesto.

Ubos karon sa pagdumala ni Atty. Koko Holganza isip chairman sa Cebu City Traffic Management Committee, ug ni ma’am Raquel Arce nga maoy department head sa CCTO, mohatag sila og pahalipay sa mga nagtinarong nga enforcer.

Wa kini himoa kaniadto, mao nga kamong mga traffic enforcer, pagtarong gyud aron nga magdugay kamo sa inyong katungdanan.

Timan-i ninyo ang gisulti ni Mayor Rama nga dili siya gusto nga makig-uban sa mga tawo nga kurakot, kusog mangilkil. Ang uban nakong mga kauban sa Traffic Board nga mga “tubig-tubigan” nagtinabangay sila aron nga makahatag og mga pahalipay sa mga buotang traffic enforcer.

* * *

Mga lumolupyo sa Sitio Upper Fatima, sakop sa Barangay Apas nagpahigayon og yanong salo-salo kaniadtong Domingo sa gabii ug gidapit nila si Barangay Captain Virgil Jingjing Cabigon.

Ang tumong nila paghimo’g salo-salo mao ang pagpasalamat sa kapitan kay gisanong ang ilang hangyo nga giayo ang gubaon kaayo nilang karsada sa sitio.

Wa sab nila kalimti pagdapit si Rey Suelto, ang action man ni Kap. Jingjing, nga maoy nangulo sa mga mitrabaho sa karsada. Haum gyud kaayo kini si Rey nga mag-konsehal.

Salamat kaayo Kap Jingjing!