Sa katapusang mga adlaw

Daw sa napuno ang akong messenger sa mga mensahe ug mga links nga dunay kalambigitan sa katapusan sa kalibotan kun doomsday prophecies, three days darkness, ang anti kristo, solar tsunamis ug uban pa.

Matud pa sa akong higala kaniadto daw sa mawindang ta kun atong paminawon kining mga butanga. Pun-an pa sa nahitabo didto sa Germany nga ang mga kaobispohan didto ang niuyon nga himoon nang panalanginan ang same sex union, ang mga layko pwede na mobunyag ug mowali mismo sulod sa misa.

Ang gisugyot nga Mayan Rite sa Santos nga Misa ug uban pang mga hilisgutan nga nakapakutaw og samot sa atong hunahuna. Dinhi sa ato ambot kun tinuod ba nga matud pa 41 percent na lamang sa mga katoliko ang mosimba o manginlabot sa mga kaliukan sa simbahan. Nagpasabot ba kini nga haduol na ang katapusan? Wala ta masayud higala.

Unsay angayan natong himoon?

Alang nako mas makapatandog ang panahom ni Saint Dominic Savio nga magpadayon siya sa pagduwa bisan pa man kun sayud siya nga usa na lang ka adlaw ang iyang pagpuyo ning kalibutana. Ang mensahe mao nga angayan lamang kitang mangandam ug magmalig-on. Ngano man?

1.   Tungod kay ang dautan anaa bisan asa. Padayon silang nanghilabot kanato kay lagi ang uban kanato nitugot man nga makasulod sila sa atong kinabuhi.

2.   Kining maong mga hitabo, lakip na ang pagtay-og sa yuta kasinatian man sa paghingpit ug pagpurga kanato.

3.   Ang tanan kabahin lamang sa naandang kutay sa kinaiyahan ug sa uniberso ug sanglit kabahin man lamang kita niini kita gyud maapektuhan.

4.   Nindot ang giingon ni Kristo Jesus: “Kun magsugod na kini og panghitabo, hangad kamo kay haduol na ang inyong kaluwasan!”