Mas maayo relibohan ang tibuok NOPPO

Natay-og ang nasud sa nahitabo sa Negros Oriental dihang walay kukaluoy nga gipatay si Governor Roel Degamo ug ang laing walo pa ka tawo atol sa distribution sa ayuda mismo sa compound sa mga Degamo.

Nahitabo kini adlawang dako diin wala gyud magdahum nga mosangpot sa ingon niadto ka brutal ang gidangatan sa mga biktima.

Kita sa CCTV ang pagsulod sa mga armadong tawo nga nakasul-ob og mga sundalo kinsa wala magpanuko sa pagpamusil sa mga tawo nga anaa sa sulod apil na ang gobernador.

Dili yanong krimen, usa ka makapakitbi sa atay nga massacre ang gihimo sa mga kriminal nga sama sa yawa ang ilang gibuhat sa mga tawo.

Nadakpan ang mga killer kinsa ang uban nagserbisyo isip mga sundalo apan nangadismis gumikan sa mga dautang binuhatan.

Sa ilang pagkasikop gikanta nila kinsa ang utok nga nagmando sa ilang gihimo walay lain kon dili ang usa ka magbabalaod nga kabahin sa political opponent sa napatay nga gobernador.

Hinuon gikinahanglan nga ipatigbabaw ang due process kay kong laway lang ang ilang basehan ug walay kongkretong ebidensya nga gihuptan basin mapurnada ang ilang alegasyon ilabi na kon hearsay ang tanan.

Mao kini ang nakaparat sa systema sa hustisya ilabi na kong gamhanan ug kwartahan ang nalambigit kay daugon man dayon sa teknikalidad.

Asa kaha mosangpot kining panghitabo sa Negros Oriental? Kong ang kapolisan wala kunoy angayan ikabalaka apan lahi man ang atong nasaksihan kay ang mga elite forces gipa-deploy naman nila sa lalawigan.

Gihimo nila kini aron segurado nga dili na malutsan kay sa pagkakaron wala pa man gyud mataral sa hukmanan ang gitumbok nga mastermind.

Samtang maayo ra sad nga girelibohan ang mga pulis sa mga lungsod nga gihulagway nga suod sa mga politiko aron dili ma-jeopardize ang gihimo karon sa PNP pagtugkad sa panghitabo.

Mas maayo gani ang tibuok Negros PNP ang hulipan aron segurado nga wala nay mohudas sa ilang grupo kay naa man gyud nay intel ang utok sulod sa PNP nga maoy motaho ngadto sa mastermind.

Nisulpot man gani to sa social media ang mga sakop sa Negros Oriental PNP ang nag-mañanita sa magbabalaod sa birthday niya niadtong nakalabay’ng tuig.

Bisan Diniyos ug pure greetings ra to apan kong dunay motumaw nga kontrobersya malambigit gyud sila. Busa leksiyon sa mga pulis nga subrang makig suod sa mga politiko aron makalikay sa mga pagduda.