Usbon gyud ang  Batakang Balaod?

Giaprobahan sa Ubos Balay Balauranan ang resolution nga buot mag-usab sa 1987 nga Batakang Balaud pinaagi sa Constitutional Convention o Concon.

Ang pag usab sa Batakang Balaud gipaboran kini sa 301 ka kongresista, unom ang misupak ug usa ang nag-punso pilato o wala mobotar.

Ang resolution nga giaprobahan nga mag-usab sa 1987 nga Batakang Balaud wala maghisgot sa pag-usab sa istraktorang politikal kun dili nakatutok kini sa probisyon nga pang ekonomiya.

Gusto sa mga magbabalaud nga usbon ang probisyon nga pang-ekonomiya tungod kay mao kini ang nakababag sa mga magpapatigayon nga langyaw sa pagbubo sa ilang puhonan dinhi sa nasud.

Gusto sa mga magbabalaud nga makapanag-iya og yuta dinhi sa nasud ang mga langyaw, public utilities ug mga negosyo dinhi sa nasud.

Bisan og gipadayag na ni Presidente Bongbong Marcos Jr. nga dili prayoridad sa iyang administrasyon ang pag-usab sa Batakang Balaud, giduso ug gipadayon gayod sa mga magbabalaud ang pagtuki ug pag usab sa Batakang Balaud.

Nganong pasanginlan man sa mga magbabalaud ang Batakang Balaud sa wala paglambo sa ekonomiya sa nasud nga kun atong tan-awon milambo man ang atong ekonomiya.

Sakto si Senador Koko Pimentel sa pag-ingon nga aduna nay daghan nga mga balaud nga gipatuman ang nasud alang sa negosyo ug ekonomiya sama sa Public Service Act, Retail Trade Liberalization Act, Foreign Investment ug uban pa nga nagtugot sa mga langyaw nga magpapatigayon nga makaapil og dako sa ekonomiya sa nasud.

Kun unsa man ka init sa Ubos Balay Balauranan ang pag-usab sa Batakang Balaud, dili ingon ani ka init ang mga Senador sa Senado.

Si Presidente Bongbong Marcos midaug ubos sa Partidong Federal apan ang iyang mga alipores nga mga magbabalaud wala na maghisgot og Federalismo sa gisugyot nilang pag-usab sa Batakang Balaud.