Humanon ang CCMC pinaagi sa mga private donations

Kagahapon atong gihisgutan ang mahitungod sa giingon nga ‘Private groups unite for health initiatives,’ diin ang Manila Doctors’ Hospital, ug usa ka private medical organization (co-sponsored sa COSE), naghiusa pagpahigayon sa free medical consultations sa Graceville, San Jose del Monte, Bulacan. A team of nurses and pharmacists accompanied the consulting doctors from the Manila Doctors.

Ang main beneficiaries sa maong event, mao ang mga senior citizens sa maong dapit. Gihisgutan usb nato ang ilang ‘home for older persons’ nga gi-financed sa private sector – ang German Catholic NGO MISEREOR.

Private sector initiative. Dako ang mahimo niini ngadto sa gobiyerno ug sa katilingban mismo. Mayor Mike Rama is in the right direction sa iyang pag-ingon nga ang Cebu City Medical Center “will have to be completed by November of this year without a single centavo shelled out from the coffers of the city government. This as the city government has resorted to a public-private partnership scheme to finish the structure.”

Ug matud sa mayor, dili siya mohunong sa iyang “investment begging” alang sa CCMC. Atong buligan ang Mayor sa iyang pagpakilimos alang sa Cebu City Medical Center.

* * *

Sa atong makita sa pagpasundayag sa television ug sa social media, sa atong mga tourist spots,   makaingon kita nga matahom ang atong nasud, puno sa mga natural beauties. Usahay ato lang kining gi-take for granted, ug mas mo-appreciate sa katahom sa ubang nasud. Aduna kitay mentality nga nindot gyud basta something foreign.

Sa YouTube, atong makita ang mga first timer nga makaanhi sa atong nasud, nga mapuno sa mga pagdayeg sa katahom sa atong nasud, sa pagkamaabi-abihon natong mga Pinoy, lakip na gani sa atong pagkaon dinhi.

Mao bitaw nga midagsang ang mga langywang turista nganhi sa atong nasud, lakip na kita dinhi sa Kabisay-an ug Kamindanawan. Sa Boracay, pananglitan, bisan og dili vacation season, last month, namungingi ang mga foreign tourists. Malingaw ka kay nag-‘two-piece’ lang ang uban kanila.

Only very recently, sa bag-o lang natapos nga Asia’s Diving Exposition, ang Diving and Resort Travel Show gihimo sa Malaysia,  ang Cebu gipili nga usa sa labing maayo nga dive spots sa tibuok nasud, ug maoy nakadaug, and “won the best dive destination award.”

Kini ang gipahibawo sa Tourism Promotions Board Philippines (TPBP), usa ka attached agency sa Department of Tourism (DOT. Gawas sa Sugbo, na-mentioned usab ang Negros Oriental, Batangas, ug Palawan, as among the top dive spots in the country.

Gawas niining maong award, ang DOT naglantaw sa laing pagdaug, sa 30th World Travel Awards isip leading dive and beach destination sa Asia. Ang Sugbo gi-nominate usab isip Asia’s wedding destination. Sa ato pa, kon atong maangkon kining maong award, atong mapaabot ang daghan unyang mga langyaw nga anhi sa ato magpakasal.

By the way, ang Sugbo naka-record og kapin 2.7 million ka tourist arrivals sa niaging tuig, mga 540,000 niini mga langyaw. Number one ang Cebu City, among the LGUs here, with 1,063,503 tourist arrivals, kasagaran domestic tourists, apan ang mga langyaw miabot og 221,983.

More or less, naila na sa tibuok kalibutan ang katahom sa atong nasud.